"İlk olaraq qeyd etmək istərdim ki, əvvəllər Azərbaycan adlı ölkə haqqında məlumatım yox idi. Lakin sonradan gördüm ki, Bakı şəhəri olduqca gözəl və müasir bir şəhərdir və ABŞ-də yerləşən Çikaqo şəhərini xatırladır".

Prosport.Az xəbər verir ki, bu sözləri “Şəki”dən ayrılan sabiq kapitan Samir Styuart deyib.

ABŞ-li basketbolçu Azərbaycan və çempionatımız barədə fikirlərini bölüşüb: "ABL Liqasına gəlincə isə bu liqada mübarizəni davam etdirə bilmədiyim üçün təəssüf hissi keçirirəm. Liqada yüksək büdcəyə malik, həm legionerlərdən, həm də yerli oyunçulardan ibarət güclü heyətlərə sahib komandalar var. “Sabah” və “Abşeron Layns” kimi klublar buna nümunədir.

“Şəki”də çıxış etmək isə mənim üçün böyük məmnuniyyət idi. Digər komandalarla müqayisədə məşqçi heyətinin sayının az olması müəyyən çətinliklər yaratsa da, baş məşqçi ilə basketbol mövzusunda çoxlu müzakirələr apardıq və bu, aramızda peşəkar və səmimi münasibətin formalaşmasına səbəb oldu. Eyni zamanda komanda yoldaşlarımla da yaxşı əlaqələr quruldu.

Təəssüf ki, mövsümün zədəyə görə bu şəkildə başa çatması arzuolunan olmadı. Bununla belə, mənə göstərilən etimada və yaradılan imkana görə ABL Liqasına və kluba təşəkkürümü bildirirəm”.

O, Azərbaycan Basketbol Liqasını əvvəllər oynadığı Polşa və Bosniya və Herseqovina çempionatları ilə müqayisə edib: "Azərbaycanda oynamaq mənim üçün çətin olmadı. Ən böyük çətinlik ABŞ-də yaşayan yaxınlarımla vaxt fərqinin 9–10 saat təşkil etməsi səbəbindən ünsiyyət qurmaq idi.

Basketbola gəldikdə isə rəqabət səviyyəsi, komanda yoldaşları fərqli ola, şəhər və ya ölkə dəyişə bilər. Lakin basketbolun özü dəyişmir. Basketbol hər yerdə eyni qaydalarla oynanılır. Bu baxımdan, uyğunlaşma prosesi mənim üçün nisbətən asan oldu”.