Azərbaycan şahmatçısı Aydın Süleymanlı Niderlandın Veyk-an-Ze şəhərində keçirilən nüfuzlu “Tata Steel Challengers” turnirində vahid liderə çevrilib.

Prosport.Az xəbər verir ki, gənc qrossmeyster III turda Niderland təmsilçisi Elin Rubersi məğlub edib və 2,5 xal toplayaraq turnir cədvəlinin zirvəsində təkbaşına qərarlaşıb.

Azərbaycan şahmatçısını hərəyə 2 xal toplayan 7 iştirakçıdan ibarət qrup izləyir. Onların arasında dünya şahmatının əfsanələrindən biri, 56 yaşlı ukraynalı Vasili İvançuk da var. IV turda Süleymanlı çinli Lu Maoyi ilə qarşılaşacaq.

Xatırladaq ki, “Challengers” turnirinin qalibi gələn il Veyk-an-Ze də təşkil ediləcək və əsas yarış olan “Tata Steel Masters”də iştirak etmək hüququ qazanır. Ötən il şahmatçımız “Challengers” turnirində 1–2-ci yerləri bölüşsə də, əlavə göstəricilərə görə 2-ci olmuşdu.