Dekabrın 6-da Azərbaycan MMA və Qrapplinq Federasiyasının ümumi yığıncağı keçirilib.

Prosport.Az xəbər verir ki, Gənclər və İdman Nazirliyində təşkil olunan tədbir Dövlət Himninin səsləndirilməsi ilə başlanıb. Federasiyanın İdarə Heyətinin üzvü Elşən Eynullayev çıxış edərək iştirakçıları salamlayıb.

Gündəliyə uyğun olaraq, Azərbaycan MMA və Qrapplinq Federasiyasının Nizamnaməsinin yeni redaksiyası səsvermə yolu ilə qəbul edilib. Federasiyanın 2025-ci ildə görülmüş işləri, idman yekunları və digər məsələlər səsvermə ilə təsdiqlənib.

Ardınca Azərbaycan MMA və Qrapplinq Federasiyasının İdarə Heyətinin tərkibində dəyişiklik edilib. Səsvermənin nəticələrinə əsasən, Tofiq Musayev federasiyanın vitse-prezidenti seçilib. T. Musayev çıxış edərək göstərilən etimada görə təşəkkür edib və bu idman növünün inkişafı üçün əlindən gələni əsirgəməyəcəyini bildirib.

Azərbaycan MMA və Qrapplinq Federasiyasının prezidenti Azad Əsgərov federasiyanın inkişafı üçün birgə fəaliyyətin vacibliyini qeyd edib.

Tədbirin sonunda gənclər və idman naziri Fərid Qayıbov yeni seçilmiş rəhbərliyi təbrik edib və gələcək fəaliyyətlərində uğurlar arzulayıb.