Batumidə (Gürcüstan) keçirilən şahmat üzrə milli komandalar arasında Avropa çempionatında Azərbaycanın kişi yığması liderləri izləməyə davam edir, xanımlarımız isə cari yarışda ilk dəfə məğlub olub.

Prosport.Az xəbər verir ki, qitə birinciliyində 4-cü turun oyunları başa çatıb.

Kişilərdən ibarət yığmamız Niderlandla üz-üzə gəlib. Bütün partiyalar heç-heçə başa çatıb və matç 2:2 hesabı ilə yekunlaşıb. 4 turdan sonra yığmamızın aktivində 6 xal var və 3–9-cu yerləri bölüşür. Lakin əlavə göstəricilərə əsasən, komandamız 5-ci pillədə qərarlaşıb.

Turnir cədvəlinə isə 8 xalı toplayan Serbiya millisi başçılıq edir. Onlardan bir xal geri qalan Ukrayna 2-ci yerdə qərarlaşıb.

V turda kişi şahmatçılarımız Yunanıstan yığması ilə qarşılaşacaq.

Qadınlardan ibarət Azərbaycan millisi isə ilk məğlubiyyətini alıb. Komandamız Almaniyaya 1,5:2,5 hesabı ilə uduzub. Yeganə məğlubiyyəti Gülnar Məmmədova yaşayıb, digər partiyalar isə heç-heçə başa çatıb.

Şahmatçı qadınlarımız 4-cü yerdən 7-ci pilləyə eniblər. Onların aktivində 5 xal var. Turnir cədvəlinə 8 xal toplayan Polşa və Almaniya yığmaları başçılıq edir.