III MDB Oyunlarını işıqlandırmaq üçün Azərbaycana gəlmiş 5 ölkənin (Özbəkistan, Türkmənistan, Belarus, Rusiya, Pakistan) KİV nümayəndələri yerli media ilə birgə Şuşa – Xankəndi marşrutu üzrə yaddaqalan mediaturun iştirakçıları olub.
Prosport.Az xəbər verir ki, Qarabağın incisi, Azərbaycan mədəniyyətinin beşiyi olan Şuşada jurnalistlər onun zəngin tarixi-mədəni irsi və qədim şəhərin təkrarolunmaz ab-havası ilə tanış olub.
Mediaturun marşrutu Şuşanın Mərkəzi Meydanından başlayıb. Meydana yaxın ərazidə yerləşən əfsanəvi “Xan qızı” bulağı XIX əsrdə görkəmli şair Xurşidbanu Natəvan tərəfindən çəkilib. Xalq arasında “Xan qızının bulağı” adı şairin xeyirxah əməlini ehtiramla yaşadır.
Daha sonra jurnalistlər şəhərin ən tanınmış simvollarından biri olan Şuşa qalasının Gəncə qapılarını izləyə bilib. Qarabağ xanı Pənahəli xan tərəfindən 1750–1752-ci illərdə inşa edilən qala vaxtilə üç əsas girişə — Gəncə, İrəvan və Ağoğlan qapılarına malik idi. Bu tarixi məkan bu gün dünyanın hər yerindən gələn qonaqların ən çox şəkil çəkdirdiyi yerlərdəndir.
Xüsusi diqqəti isə möhtəşəm memarlıq abidəsi — Gövhər ağa yuxarı məscidi cəlb edib. Bu abidə Şuşanın mədəni irsinin mühüm parçasıdır.
Jurnalistlərdə unudulmaz təəssürat yaradan məkan isə Cıdır düzü olub. Daşaltı dərəsinin kənarında yerləşən bu məşhur məkan hər bir azərbaycanlı üçün rəmz, xarici qonaqlar üçün isə kəşf olub.
Növbəti dayanacaq Şuşadan 4 km məsafədə, dəniz səviyyəsindən 1300 m hündürlükdə, sıx meşənin içində yerləşən “İsa bulağı” istirahət kompleksi olub. Azərbaycan təbiətinin incisi sayılan bu bulağın suyu soyuq, saf və şəfalıdır. Burada qonaqlar üçün nahar təşkil olunduqdan sonra mediatur Xankəndidə davam edib.
Xankəndidə jurnalistlər Qarabağ Universitetini ziyarət ediblər və mühüm idman hadisəsinin şahidi olublar.
Məhz Xankəndi şəhər stadionunda, tamamilə yenilənmiş arenada, III MDB Oyunları çərçivəsində kamandan oxatma yarışları start götürüb. Bu, şəhərin azad olunmasından sonra qəbul etdiyi ilk beynəlxalq idman tədbiridir.
MDB ölkələrinin ən yaxşı oxatanları burada toplaşaraq III MDB Oyunlarının medalları uğrunda mübarizə aparırlar. Turnir oktyabrın 5-dək davam edəcək.
