Dünən Azərbaycanda keçirilən III MDB Oyunlarının rəsmi açılış mərasimi baş tutdu.

Prosport.Az Azərbaycanın 7 şəhərini əhatə edən bu yarışla bağlı vacib məlumatları təqdim edir.

Bu turnirdə 20 idman növü üzrə yarış keçiriləcək. Həmin yarışların keçirilmə tarixləri və məkanları ilə tanış olaq:

Stolüstü tennis – 26-29 sentyabrda keçiriləcək, 29 sentyabrda bütün qaliblər mükafatlandırılacaq (Qəbələ Olimpiya İdman Kompleksi)
Futbol – 27 sentyabr – 4 oktyabrda keçiriləcək (Qəbələ şəhər stadionu)
Çövkən – 28 sentyabr – 7 oktyabrda keçiriləcək, 6-7 oktyabrda qaliblər bilinəcək (Şəki şəhər stadionu)
Üzgüçülük – 28 sentyabr – 2 oktyabrda keçiriləcək (Gəncə İdman Sarayı)
Stend atıcılığı – 28 sentyabr – 1 oktyabrda keçiriləcək (Qəbələ Atıcılıq Klubu)
Voleybol – 29 sentyabr – 6 oktyabrda keçiriləcək (Gəncə İdman Sarayı)
Sambo – 29 sentyabrda keçiriləcək (Göygöl Olimpiya İdman Kompleksi)
Boks – 29 sentyabr – 5 oktyabrda keçiriləcək, 2-5 oktyabrda qaliblər bilinəcək (Yevlax Olimpiya İdman Kompleksi)
Taekvondo – 29-30 sentyabrda keçiriləcək (Mingəçevir "Kür" Olimpiya Tədris-İdman Mərkəzi)
Badminton – 30 sentyabr – 5 oktyabrda keçiriləcək, 2 və 5 oktyabrda qaliblər bilinəcək (Qəbələ Olimpiya İdman Kompleksi)
Batut gimnastikası – 1-3 oktyabrda keçiriləcək, 2-3 oktyabrda qaliblər bilinəcək (Şəki Olimpiya İdman Kompleksi)
Kamandan oxatma – 2-5 oktyabrda keçiriləcək, 5 oktyabrda qaliblər bilinəcək (Xankəndi şəhər stadionu)
Qılıncoynatma – 2-7 oktyabrda keçiriləcək (Gəncə İdman Sarayı)
Güləş – 3-4 oktyabr (sərbəst və qızlar) və 7 oktyabrda (yunan-Roma) keçiriləcək (Gəncə Olimpiya İdman Kompleksi)
Karate – 3-4 oktyabrda keçiriləcək (Mingəçevir "Kür" Olimpiya Tədris-İdman Mərkəzi)
Cüdo – 4-5 oktyabrda keçiriləcək (Göygöl Olimpiya İdman Kompleksi)
3x3 basketbol – 5-6 oktyabrda keçiriləcək (Gəncə basketbol meydançası)
Avarçəkmə – 5-6 oktyabrda keçiriləcək (Mingəçevir "Kür" Olimpiya Tədris-İdman Mərkəzi)
Kaneo sprint – 5-6 oktyabrda keçiriləcək (Mingəçevir "Kür" Olimpiya Tədris-İdman Mərkəzi)
Bədii gimnastika – 6-8 oktyabrda keçiriləcək (Şəki Olimpiya İdman Kompleksi)

Yarışda 13 ölkə iştirak edir. Meydan sahibi Azərbaycandan başqa, MDB-yə üzv ölkələr – Rusiya, Belarus, Qazaxıstan, Qırğızıstan, Tacikistan, Türkmənistan, Özbəkistan, eləcə də xüsusi dəvət edilmiş ölkələr – Kuba, Küveyt, Oman, Pakistan və Türkiyənin idmançıları yarışır.

Hazırda Rusiya 13 medalla (9-2-2) turnir cədvəlinə başçılıq edir. Belarus 8 medalla (1-4-3) 2-cidir. Qazaxıstan 5 medalla (0-3-2) 3-cüdür. Azərbaycan medal sıralamasını tamamlayır. Komandamızın aktivində 4 rəsmi medal var. Bunlar üzgüçülükdən qazandığımız 1 gümüş və 3 bürünc medaldır.

Bəs əvvəlki yarışlarda neçə medal qazanmışıq?

9 ölkənin qatıldığı, 15 idman növünün olduğu I MDB Oyunları 2021-ci ildə Rusiyanın Kazan şəhərində təşkil olunub. Həmin vaxt Azərbaycan təmsilçiləri 60 medal əldə edib. Onlardan 15-i qızıl, 16-sı gümüş, 29-u bürüncdür. Həmin yarışda 4-cü olmuşuq.

22 ölkənin qatıldığı, 20 idman növünün olduğu II MDB Oyunları isə 2023-cü ildə Belarusun paytaxtı Minsk və bir neçə şəhərdə keçirilib. Ölkə idmançıları bu dəfə 62 mükafatla (10 qızıl, 17 gümüş, 35 bürünc) medal sıralamasında 4-cü yerdə qərarlaşıb.

26 sentyabr – 8 oktyabr tarixlərində keçirilən III MDB Oyunlarında Azərbaycanı 340, Rusiyanı 262, Özbəkistanı 254, Belarusu 240, Qazaxıstanı 147, Tacikistanı 144, Qırğızıstanı 126, Türkmənistanı 48, Türkiyəni 38, Küveyti 6, Pakistan və Omanı isə 4 idmançının təmsil edəcəyi dəqiqləşib.

Qeyd edək ki, III MDB Oyunları bu il sentyabrın 28-dən oktyabrın 8-dək Azərbaycanın yeddi şəhərində – Gəncə, Yevlax, Mingəçevir, Qəbələ, Şəki, Göygöl və Xankəndidə təşkil olunacaq. Yarışın açılış mərasimi sentyabrın 28-də, bağlanış mərasimi isə oktyabrın 8-də Gəncə şəhər stadionunda baş tutacaq.