Bu gün Azərbaycan Respublikasının Prezidenti İlham Əliyevin iştirakı ilə yeni istifadəyə verilmiş Gəncə stadionunda III MDB Oyunlarının rəsmi açılış mərasimi baş tutub.
Prosport.Az xəbər verir ki, öncə Azərbaycan Respublikasının Dövlət bayrağı qaldırılıb, sonra isə himnimiz səsləndirilib. Ardından III MDB Oyunlarının iştirakçı ölkələrinin paradı baş tutub. Azərbaycan bayrağını karateçi Asiman Qurbanlı və taekvondoçu Zemfira Həsənzadə daşıyıb.
Təntənəli tədbirdə Azərbaycan Respublikası Baş nazirinin müavini, III MDB Oyunlarının Təşkilat Komitəsinin sədri Samir Şərifov çıxış edərək, qonaqlar, atletlər, məşqçilər və idmansevərləri salamlayıb. O, qeyd edib ki, 10 gün davam edəcək yarışlarda MDB ölkələrindən, həmçinin, Oyunlara qatılan Türkiyə, Pakistan, Oman, Kuba və Küveytdən 2400 nəfərlik idman nümayəndə heyətləri iştirak edir. “Bu idman oyunları dostluq, sülh, qarşılıqlı hörmət meyarlarına əsaslanan ədalətli mübarizə meydanı olacaq, ölkələrimiz, xalqlarımız arasında əməkdaşlığın genişlənməsinə, münasibətlərin daha da dərinləşməsinə mühüm töhfə verəcək”, – deyə Komitənin sədri bildirib.
Daha sonra MDB Baş katibinin müavini Nurlan Seytimov çıxış edib. O, MDB Baş katibi Sergey Lebedevin təşkilatçılara, iştirakçılara və qonaqlara müraciətini səsləndirib. N.Seytimov III MDB Oyunlarının Birliyin idman hərəkatı tarixində parlaq iz buraxacağı və əməkdaşlığın daha da möhkəmlənməsinə xidmət edəcəyini əminliklə ifadə edib.
Bunun ardından, III MDB Oyunlarının andiçmə mərasimi keçirilib. İdmançılar adından çövkən üzrə milli yığma komandanın kapitanı, dünya və Avropa çempionu Elçin Camallı, məşqçilər adından sərbəst güləş üzrə yığma komandanın baş məşqçisi Əsgərxan Novruzov, hakimlər adından isə bədii gimnastika üzrə beynəlxalq dərəcəli hakim Ləman Cəbrayılova and içib.
Azərbaycan Respublikasının Prezidenti İlham Əliyev III MDB oyunlarını rəsmi olaraq açıq elan edib. Bunun ardından III MDB oyunları üçün hazırlanan rəsmi mahnı sədaları altında MDB bayrağı qaldırılıb.
Açılış mərasimi bədii hissə ilə davam edib. Tamaşaçılar Qarabağ atlarının möhtəşəm çıxışını izləyib. Bundan başqa, səmaya sülh rəmzi olan ağ göyərçinlər buraxılıb. Açılış mərasimi dronların şousu və möhtəşəm atəşfəşanlıqla bitib.
Qeyd edək ki, III MDB Oyunların bağlanış mərasimi 8 oktyabr tarixində Gəncə stadionunda baş tutacaq.
