III MDB Oyunlarının çərçivəsində Gəncə İdman Sarayında edən üzgüçülük yarışlarında növbəti medalçılar müəyyənləşib.

Prosport.Az xəbər verir ki, qadınların mübarizəsində arxasıüstə 200 metr məsafəyə üzmə yarışında rusiyalı Anastasiya Kobzar 1-ci, qazaxıstanlı Marqarita Zaytseva və onun həmyerlisi Marqarita Rayenko növbəti pillələrdə qərarlaşıb.

Kişilər arasında 1500 metr məsafəyə sərbəst üsulla üzmə yarışında rusiyalı Aleksandr Filipets qızıl medal, Azərbaycan üzgüçüsü Süleyman İsmayılzadə gümüş medal, daha bir rusiyalı Boqdan Toropkin isə bürünc medal qazanıb.

4×100 metr məsafəyə qarışıq estafet yarışında Rusiya yığması 1-ci, Belarus 2-ci, Qazaxıstan 3-cü, Azərbaycan millisi 4-cü, Özbəkistan isə 5-ci yeri tutub.

Kişilər arasında 200 metr məsafəyə 4 üslübdan ibarət fərdi üzgüçülük yarışında rusiyalı İlya Lamşanov qızıl, belaruslu Maksim Maluşka gümüş, Azərbaycan üzgüçüsü Yeqor Maynitski isə bürünc mükafat əldə edib.

Daha öncə qadınların 100 metr məsafəyə baterflay üsulu üzrə yarışında Azərbaycan idmançısı Mehri Əbdürəhmanlı bürünc medal əldə edib. Bu, Azərbaycanın MDB Oyunları tarixində üzgüçülükdə ilk medalları olub.

Qeyd edək ki, mükafatlandırma mərasimində Azərbaycanın gənclər və idman naziri Fərid Qayıbov iştirak edib.

Hazırda Azərbaycanın aktivində qeyri-rəsmi 3 gümüş və 2 bürünc medal var. Stolüstü tennisdə 2 gümüş medalımız sabah rəsmiləşəcək.