III MDB Oyunlarının çərçivəsində Gəncə İdman Sarayında davam edən üzgüçülük yarışlarında medalçılar müəyyənləşib.

Prosport.Az-ın bu yarışa ezam olunmuş əməkdaşı xəbər verir ki, ilk olaraq qadınların yarışında 800 metr məsafəyə sərbəst üsulla üzmədə mükafatçılar müəyyənləşib.

Rusiya təmsilçisi Anastasiya Çernışova 1-ci, onun həmyerlisi Valeriya Brazniçenko 2-ci, Belarusdan olan Kseniya Mastoviç 3-cü yeri tutub. Azərbaycan üzgüçüsü Anastasiya Qnussina 4-cü yerlə kifayətlənib.

Kişilərin mübarizəsində 50 metr məsafəyə arxasıüstə üzmə yarışında qalibin adına aydınlıq gəlib. Rusiyalı Dmitrii Kravtsov 1-ci, Belarusdan olan Nikita Apanasik və Kiril Bantşeviç müvafiq olaraq 2 və 3-cü yerləri tutub.

Qadınların 100 metr məsafəyə baterflay üsulu üzrə rusiyalı Yevgeniya Sadovnikova qızıl, qazaxıstanlı Taissiya Korotkova gümüş, Azərbaycan idmançısı Mehri Əbdürəhmanlı bürünc medal əldə edib.

Qeyd edək ki, Mehri Əbdürəhmanlı üzgüçülük üzrə millimizin baş məşqçisi Rəşad Əbdürəhmanovun qızıdır.

Onu da bildirək ki, dünən oğlan və qız stolüstü tennis komandalarımız finalda Rusiyaya uduzaraq gümüş medalla kifayətlənib. Lakin 27 Sentyabr – Anım Günü ilə əlaqədar olaraq onlara mükafat sabah təqdim olunacaq.