Gəncə və Azərbaycanın daha 6 şəhərində keçiriləcək III MDB Oyunlarının bayraqdarı qız idmançı olacaq.

Prosport.Az-ın xəbərinə görə, əvvəlki 2 MDB Oyunlarından fərqli olaraq, bu dəfə Azərbaycanın bayraqdarı oğlan yox, qız idmançı seçilib.

Hazırda həmin idmançının kimliyi barədə son dəqiqləşdirmələr aparılır. Bizdə olan məlumata görə, namizədlər arasında karate üzrə İnci Əzizova var. O, 2021-ci ildə Kazanda keçirilmiş I MDB Oyunlarının qalibidir. 

Kamandan oxatma üzrə son Azərbaycan çempionatının bürünc medalçısı Fatimə Hüseynli də namizədlər arasındadır. O, 2023-cü ildə Belarusun Moqilyov şəhərində keçirilmiş II MDB Oyunlarında kamandan oxatmanın miks yarışında 3-cü yeri tutub.

Qılıncoynatmanın şpaqa növündə çıxış edən Xədicə Həsənli də bayrağımızı daşımağa namizəddir.

Onu da qeyd edək ki, bu dəfə 2 bayraqdar olacaq. Bunlardan biri ümumi MDB Oyunlarının açılışı zamanı qarşıda gedəcək. Digəri isə Azərbaycan nümayəndə heyətinin önündə bayrağımızı daşıyacaq. Sentyabrın 26-da stolüstü tennis və sentyabrın 27-də futbol yarışları ilə start götürəcək III MDB Oyunlarının açılış mərasimi ayın 28-də Gəncə şəhər stadionunda baş tutacaq.

Xatırladaq ki, bayraqdarımız Rusiyanın Kazan şəhərində keçirilmiş I MDB Oyunlarında yunan-Roma güləşçisi Həsrət Cəfərov, Belarusun paytaxtı Minsk və başqa şəhərlərində baş tutmuş II MDB Oyunlarında çimərlik futbolu üzrə millimizin üzvü Elşad Manafov olub.