Azərbaycan yığması Çinin Çendu şəhərində keçirilən XII Dünya Oyunlarında 2-ci medalı qazanıb.

Prosport.Az xəbər verir ki, ölkəmiz akroabtika gimnastikasında fəxri kürsüdə yer alıb.

Murad Rəfiyev və Daniel Abbasovdan ibarət kişi cütlüyü 28.730 xalla gümüş medal qazanıb. İlk pilləni ispaniyalı, 3-cü yeri isə portuqaliyalı cütlük tutub.

Xatırladaq ki, daha əvvəl karateçimiz İrina Zaretskaya (68 kq) finalda uduzaraq, Oyunların gümüş medalına yiyələnib. 14 idmançı ilə Dünya Oyunlarına qatılmış Azərbaycan hazırda 2 gümüş medalla 28-ci yerdədir.

Qeyd edək ki, avqustun 7-də açılış mərasimi olmuş və bu ayın 17-dək davam edəcək XII Dünya Oyunlarında Azərbaycan 4 idman növü üzrə yarışır. Bunlar gimnastika (akrobatika gimnastikası, aerobika gimnastikası, tamblinq), karate, uşu (sanda) və kikboksinqdir (K1). Bu idman növlərində 14 atletlə (11 kişi, 3 qadın) təmsil olunuruq.