"Tı kto takoy? Davay, do svidaniya" mahnısı elə gözəldir ki... Dostlarımdan biri mənə bu mahnını göstərdi. Səhv etmirəmsə, o, Türkmənistandan olmalıdır. Mənə söylədi ki, bu mahnı bu regionda məşhurdur".
Prosport.Az-ın xəbərinə görə, bunu UFC-nin Bakıda keçirilən turnirin yüngül ağır çəkidə gecənin əsas döyüşünün qalibi Xalil Rauntri Cunior deyib.
Amerikalı idmançı azərbaycanlı meyxana ifaçıları – Ehtiram və İntiqam Rüstəmov qardaşları tərəfindən oxunan "Tı kto takoy? Davay, do svidaniya" meyxanasının oktaqona gələrkən öz mahnısı kimi istifadə etməsindən danışıb. "Dostuma demişdim ki, tezliklə Bakıya gedəcəyəm, ora üçün özəl olan, oradakı adamların əksəriyyətinin sevdiyi bir şey söyləsin. O da mənə bu mahnını göstərdi, dedi ki, bu regionda məşhurdur. Sonra originalına da baxdım. 1 nəfər söz deyir, oxuyan kişini çoxlu adam əhatələyir. Çox bəyəndim. Bütün sözlərin mənasını bilməsəm də, müsbət enerji aldım. Velosiped sürəndə də buna baxırdım, məşqçim soruşurdu ki, nəyə baxırsan? (gülür). Bakı mənə xoş təsir bağışladı. Bu səbəbdən də öz mahnımın üzərinə bu saundtreki əlavə etdim. Ümid edirəm ki, hamı bəyəndi".
O daha sonra mahnının sözlərinin mənasından danışıb: "Başa düşdüyümə görə, orada deyilir ki, sən kimsən, get buradan. Bu, "rep bətl" (rap battle) kimidir. Elə gözəldir ki. Mən bu mahnını sevdim".
Qeyd edək ki, ilk dəfə bu meyxana Ehtiram və İntiqam Rüstəmov qardaşlarının iştirakı ilə 2011-ci il noyabrın 5-də Astaranın Təngərud kəndində toy zamanı çəkilib. Əsas söz İntiqam Hüseynova məxsus olub. İntiqam, Ehtiram, Rizvan Şıxızadə, Hüseyn Astaralı, eləcə də Bakıdan gəlmiş tanınmış meyxanaçılar – Rəşad Dağlı və Elşən Xəzər (Pərviz Bülbülə də bu toyda meyxana desə də, bu qafiyədə iştirak etməyib – red.) bu qafiyə ilə meyxana söyləyib.
2012-ci il 25 yanvarda "Tolışi sədo" ("Talışın səsi") qəzetinin baş redaktoru Hilal Məmmədov (həmin ilin iyunun 21-də həbs olunub və 2016-cı ilin martın 17-də əfv olunub – red.) bu meyxananı "YouTube" kanalına yerləşdirib. Bundan sonra rus dilində olan meyxananın sözləri məşhurlaşıb və hazırda 27 milyon adam həmin videonu izləyib.
Daha sonra 2012-ci ildə mahnını rusiyalı reper Timati (Xalil Rauntrinin mahnısına yerləşdirdiyi saundtrek məhz oradandır – red.) öz dostları ilə birgə Filip Kirkorova diss ataraq oxuyub. Həmin video daha da məşhurlaşıb və 68 milyon insan tərəfindən oxunub.