Naxçıvan Muxtar Respublikasının Ali Məclisinin sabiq sədri Vasif Talıbovun oğlu Seymur Talıbov Azərbaycan Şahmat Federasiyasının (AŞF) vitse-prezidenti vəzifəsindən azad edilib.

Onun əvəzinə Bəxtiyar Məmmədovla Yaqub Hüseynov vitse-prezident vəzifəsinə seçilib.

Bəs yeni vitse-prezidentlər kimlərdir? Prosport.Az bunu araşdırıb.

Bəxtiyar Məmmədov 26 sentyabr 2024-cü ildən Naxçıvan Muxtar Respublikası Ali Məsclisi sədrinin I müavinidir. Ali Məclisin VII çağırış üzrə deputatı seçilmiş B.Məmmədov həm də hazırda Ali Məclisin sədr səlahiyyətlərini icra edir.

Yaqub Hüseynov isə futboldan bizə tanış simadır. O, "Bridge" Şirkətlər Qrupunun sədri olmaqla yanaşı "Sabah" futbol klubunun Müşahidə Şurasının üzvüdür. Rəsmi sənəddə "Sabah" klubunun təsisçisi və sahibi o sayılır. Əldə etdiyimiz məlumata görə, o həm də "Sabah" şahmat klubunun təsisçisidir.

Həmçinin, Mahir Məmmədov yenidən AŞF prezidenti, Faiq Həsənov isə I vitse-prezident seçilib. İlahə Qədimova isə yenidən baş katib təyin olunub.

Qeyd edək ki, Mahir Məmmədov ötən ilin noyabrında Prosport.Az-a verdiyi müsahibəsində Seymur Talıbovun federasiyadan ayrıla biləcəyini istisna etməmişdi.