"Gimnaziadanın cüdo yarışlarına 2010-cu illəri də buraxmışdılar. Ancaq Beynəlxalq Cüdo Federasiyası (IJF) 2010 təvəllüdlü idmançıları U-18-ə aid edir. Məsələn, bu il U-18 yaş kateqoriyasına 2008, 2009 və 2010 təvəllüdlü cüdoçular daxildir. Cüdoda U-15 yaş kateqoriyası olmasa da, ora 2011 və 2012 təvəllüdlülər aid olmalıdır".
Bunu Prosport.Az-a Azərbaycan Cüdo Federasiyasının icraçı vitse-prezidenti və baş katibi Rəşad Rəsullu deyib.
Serbiyanın Luçani şəhərində keçirilmiş U-15 Gimnaziadasının cüdo yarışlarında idmançılarımızın çıxışları istənilən formada olmayıb. Belə ki, yarışa 2011-2012 təvəllüdlü 18 cüdoçu (9 oğlan, 9 qız) ilə qatılan ölkəmiz bu idman növündən cəmi 7 medal qazana bilib. Bunun 3-ü qızıl, 4-ü bürünc medal olub.
Rəşad Rəsullu uğursuzluğun səbəbini belə izah edib: "Təşkilatçılar U-15 Gimnaziadası olmasına baxmayaraq, 2010-ları da bura daxil etmişdi. Bizim bundan xəbərimiz son anda olduğundan, komandanı dəyişdirə bilmədik. Ona görə də Serbiyada 2011-2012 təvəllüdlü idmançılarla çıxış etdik. Bu yaş qrupunda isə 1 yaş çox böyük fərq edir. Əgər 2010-lar buraxılırdısa, yarışın adı U-15 yox, U-16 Gimnaziadası qoyulmalı idi. Ona görə də xüsusən oğlanlarda çıxışımız istədiyimiz kimi alınmadı".
Yeri gəlmişkən, saytımızın Serbiyaya ezam olunmuş əməkdaşı da məsələ ilə bağlı kiçik araşdırma aparıb. Türkiyə komandasının məşqçisi yarışa 2010 təvəllüdlü idmançılarla qatıldıqlarını etiraf edib. Azərbaycan idmançıları isə cüdo yarışlarının ilk günündə (11 aprel) oğlanlarda ağır çəki dərəcələri olan 55, 60, 66, 73, 81, +81 kq çəki dərəcələrində özündən 1-2 yaş böyüklərlə yarışdığından, cəmi 1 bürünc medal (Mehdi Məhəmmədəli) qazana bilib.
Qeyd edək ki, Azərbaycan idmançılarının yarışdığı idman növlərindən cüdodan başqa, atletika, badminton (parabadminton), 3x3 basketbolu, çimərlik voleybolu, boks (B klass), şahmat, qılıncoynatma, idman gimnastikası, karate, üzgüçülük (paraüzgüçülük), stolüstü tennis, tennis və güləşdə də 2010 təvəllüdlü idmançılardan istifadə olunub. Yalnız kamandan oxatma və taekvondoda 2011-ci il maksimum təvəllüd ili hesab edilib.