Azərbaycan Serbiyanın Zlatibor şəhərində keçirilən III Dünya Məktəb Oyunlarında – Gimnaziadada paraddan keçib.

Prosport.Az-ın Serbiyaya ezam olunmuş əməkdaşının verdiyi xəbərə görə, Yunanıstanın olmadığı turnirdə Azərbaycan əlifba sıralaması ilə Əfqanıstan, Ermənistan və Argentinadan sonra 4-cü yürüş edib. Avstraliya və Avstriya iştirak etmədiyindən, təşkilatçılar siyasi münasibətləri nəzərə alaraq, Ermənistanla Azərbaycan idmançılarının arasına Argentinanı yerləşdirib.

Bayraqdarlarımız yunan-Roma güləşçimiz Qurban Məcnunov və boksçumuz Kəmalə Həsənova olub. Qurban Məcnunov yeniyetmələr arasında Avropa çempionu, Kəmalə Həsənova isə Avropa 3-cüsüdür.

Qeyd edək ki, turnirdə 56 ölkənin idmançısı iştirak edir. Azərbaycan bu yarışda 191 idmançı ilə təmsil olunacaq.