4-14 aprel tarixlərində Serbiyanın dağ kurort ərazisi sayılan Zlatiborda Beynəlxalq Məktəb Federasiyasının (International School Federation) Dünya Məktəb Oyunları keçiriləcək.
Prosport.Az bu il Azərbaycanın qatılacağı ilk multiidman yarış haqda maraqlı məlumatları təqdim edir:
Dünya Məktəb Oyunları qısaca Gimnaziada kimi də tanınır. 1974-cü ildən etibarən 18 yaşadək (U-18) idmançılar arasında 19 dəfə Gimnaziada keçirilib. Məsələn, ötən ilin 21-31 oktyabrında Bəhreynin paytaxtı Manamada keçirilmiş yarışda Azərbaycan 87 medal qazanıb, əyara görə (23 qızıl, 26 gümüş, 38 bürünc medal) 7-ci olub.
Lakin budəfəki yarış 15 yaşadək (U-15) məktəbli idmançılar arasında keçiriləcək. Bu, 3-cü belə hal olacaq. 2021-ci ildə də U-15-lərin ilk Gimnaziadasına Serbiya ev sahibliyi edib. Həmin ilin 11-19 sentyabr tarixlərində baş tutmuş və Azərbaycanın da iştirak etdiyi yarış paytaxt Belqradda keçirilib. 2023-cü ildə isə Braziliyanın Rio-de-Janeyro şəhəri təşkilatçılıq edib. Bu yarışda isə Azərbaycan təmsil olunmayıb.
Budəfəki yarışın məkanı Zlatibor sayılsa da, Gimnaziada Serbiyanın digər şəhərlərində də baş tutacaq. Məsələn, Azərbaycan idmançılarının yarışacağı şəhərlər arasında Novi Sad Serbiyanın 2-ci böyük şəhəridir. Novi Sad şimalda – Voyvodina Muxtar Vilayətində yerləşir. Orada idman gimnastlarımız mübarizə aparacaq. Həmçinin, Azərbaycanın ən çox medal qazanacağı idman növlərindən olan cüdo və güləşin keçiriləcəyi Luçani şəhəri Moravitsa dairəsində (okruq) yerləşir. İdmançılarımızın mübarizə aparacağı digər idman növlərindən kamandan oxatma, 3x3 basketbolu, çimərlik voleybolu, boks, şahmat, tennis, stolüstü tennis yarışları Zlatiborda, badminton (parabadminton), üzgüçülük (paraüzgüçülük) Ujitsedə, taekvondo, karate Pojeqada, qılıncoynatma Nova Varoşda və atletika Priboyda baş tutacaq. Bu adı çəkilən şəhərlər Zlatibor dairəsində yerləşir və Zlatibordan təxminən 1 saat məsafədə yerləşir.
4-14 aprel tarixləri komandaların gəlmə və getmə tarixləri ilə ölçülüb. Əslində yarış 6-12 aprel tarixlərində baş tutacaq. Belə ki, 5 aprel tarixində açılış mərasimi (həmçinin, texniki iclas, məşq və rəsmi çəkiölçmə mərasimi) olacaq. 6 apreldən isə yarışa start veriləcək. Aprelin 9-u ölkələrin milli atributlarını nümayiş etdirdiyi gün olacaq. 12 apreldə keçiriləcək bağlanış mərasimi ilə növbəti Gimnaziada yekunlaşacaq.
Yeri gəlmişkən, bu dəfə 19 idman (3 paralimpiya) növündə mübarizə gedəcək. Bu, U-15-lərin Gimnaziadaları tarixinə ən çox idman növünün təmsil olunduğu yarış kimi adını yazdıracaq. Azərbaycan 16 idman (2 paralimpiya idman növü də daxil) növündə təmsil olunacaq. Bundan başqa, paraatletika, idman rəqsi, səmti müəyyənetmə və padel idman növləri üzrə də yarışlar baş tutacaq.
Azərbaycan idmançılarının mübarizə aparacağı idman növləri üzrə yarışların təqvimi belədir:
Kamandan oxatma (7-12 aprel) – 2011-2013 təvəllüdlülər
Atletika (8-10 aprel) – 2010-2012 təvəllüdlülər
Badminton (6-12 aprel) – 2010-2013 təvəllüdlülər
Parabadminton (6-11 aprel) – 2010-2013 təvəllüdlülər
3x3 basketbolu (7-11 aprel)– 2010-2011 təvəllüdlülər
Çimərlik voleybolu (7-12 aprel)– 2010-2012 təvəllüdlülər
Boks (10-12 aprel) – 2011-2012 (A klass), 2010 (B klass) təvəllüdlülər
Şahmat (6-10 aprel) – 2010-2016 təvəllüdlülər
Qılıncoynatma (6-8 aprel) – 2010-2012 təvəllüdlülər
İdman gimnastikası (6-7 aprel) – 2010-2011 (qızlar), 2010 (oğlanlar) təvəllüdlülər
Cüdo (11-12 aprel) – 2010-2012 təvəllüdlülər
Karate (10-11 aprel) – 2010-2013 təvəllüdlülər
Üzgüçülük və paraüzgüçülük (7-11 aprel) – 2010-2012 təvəllüdlülər
Stolüstü tennis (7-12 aprel) – 2010-2012 təvəllüdlülər
Taekvondo (8-9 aprel) – 2011-2013 təvəllüdlülər
Tennis (6-12 aprel) – 2010-2012 təvəllüdlülər
Güləş (6-8 aprel) – 2010-2012 təvəllüdlülər
Qeyd edək ki, 2742 idmançı bu Gimnaziadada mübarizə aparacaq. Ən çox idmançı ilə qatılan ölkə Serbiyanın qonşusu Rumıniyadır. Onlar 338 idmançı ilə mübarizə aparacaq. Daha sonra meydan sahibləri (319) və Braziliya (244) gəlir. Ukrayna (229) 4-cü, Azərbaycan (192) 5-cidir.
Səbuhi Musa