Azərbaycan Paris Yay Olimpiya Oyunlarına lisenziya verən güləş üzrə Avropa Olimpiya Təsnifat turnirinə ev sahibliyi edəcək.

Prosport.Az xəbər verir ki, buna Ümumdünya Güləş Birliyinin (UWW) İcraiyyə Komitəsinin iclası qərar verib.

Aprelin 4-dən 7-dək keçirilməsi nəzərdə tutulan Avropa Olimpiya Təsnifat turnirinin təşkilinə namizədliyini irəli sürən şəhərlər arasında Bakı, Tbilisi, Roma, Skopye və Varşava olsa da, yekunda paytaxtımız bu məsul yarışı keçirməyə haqq qazanıb. Beləliklə, apreldə Avropa güləşçiləri məhz Bakıda keçiriləcək yarışda hər olimpiya çəkisində 2 lisenziya uğrunda mübarizə aparacaq. Bu yarışın Milli Gimnastika Arenasında keçirilməsi nəzərdə tutulub.

Son lisenziya yarışı sayılan Dünya Olimpiya Təsnifat turnirində hər çəkidə 3 idmançı Olimpiadaya vəsiqə əldə edəcək. Bu yarış isə mayın 9-dan 12-dək İstanbulda keçiriləcək.

Xatırladaq ki, güləşdə ilk lisenziya yarışı bu il 16-24 sentyabrda Serbiyanın paytaxtı Belqradda təşkil ediləcək dünya çempionatıdır. Mundialda hər olimpiya çəkisində 5 güləşçi ölkəsinə lisenziya qazandıracaq. Ümumilikdə DÇ-də 90, qitə təsnifat turnirlərində 144 (hər birində 36), nəhayət Dünya Təsnifat turnirində 54 olimpiya vəsiqəsi öz sahibini tapacaq.