"Qeycinin irəli çıxaraq oktaqonda xaos yaratması xoşuma gəlir".

Prosport.Az xəbər verir ki, bu sözləri azərbaycanlı döyüşçü Rafael Fiziyev Castin Qeyci ilə revanş görüşü ərəfəsində amerikalı ilə ilk döyüşünü xatırlayarkən deyib.

O, martın 8-də Las-Veqasda baş tutacaq görüşdən əvvəl mətbuat konfransında rəqibini tərifləyərək sözlərinə belə davam edib: "Onun ilk döyüşümüzdə belə davranacağını gözləyirdim. Mən döyüşə hazır çıxmışdım, o isə qalib gəlmək niyyətində idi”.

Rafael Fiziyev həmçinin zədə səbəbindən Qeyci ilə görüşdən imtina edən, amma bundan əvvəl isə döyüşdən sonra xəstəxanalıq olacağı ehtimalını dilinə gətirən yeni zelandiyalı Den Hukerin sözlərinə də münasibət bildirib: “Bəlkə də belə olacaq. Buna hazıram. Ümumiyyətlə, Las-Veqasda xəstəxanalar çox qəribədir. Keçən dəfə xəstəxanaya gəldik və orada 4 saat növbə gözlədik. Sırf bu səbəbdən bir daha xəstəxanaya düşmək istəməzdim. Amma ümumilikdə doğru fikirdir – oktaqonda bu tip 2 döyüşçü üz-üzə gələndə, döyüşdən sonra ağrıkəsicilər olmadan mümkün deyil”.

O, döyüşlər arasındakı fasilə zamanı formada necə qalmasından da danışıb: “Həqiqətən hər bir potensial rəqiblə qarşılaşmağa razı idim. Çəkimi də saxlayırdım ki, hər an oktaqona çıxmağa hazır olum. Zədədən sonra forma yığanda hər gün çəkimi yoxlayırdım. Dərhal menecerimə dedim ki, rəqibi seçməklə bağlı mənimlə məsləhətləşməsin. Ən yaxşı döyüşçü, reytinqli döyüşçü, titulsuz döyüşçü, yeni gələn – mənə fərqi yoxdur. Ona dedim ki, istənilən təkliflə razılaşsın”.