Deməli, İslam Həmrəyliyi İdman Assosiasiyası builki İslamiadanın dəqiq tarixini açıqlayıb. Əslində yeni məlumat deyil, öncədən demək olar ki, hamıya yarışın Səudiyyə Ərəbistanında isti avqustda yox, məhz noyabrın bu tarixlərində olacağı bəlli idi.

Bu barədə 3 post paylaşıblar. Futbol, karate və ağırlıqqaldırmaya aid. Sağ olsunlar, 2017-də Azərbaycanın ev sahibliyi etdiyini nəzərə alıb, hicablı legionerimiz – Anastasiya İbrahimlini ağırlıqqaldıran kimi posterə vurublar.

Bilməyənlər üçün deyim ki, Qazaxıstandan olan, millliyyətcə alman olan Anstasiyanın əsl familiyası Şvabauadır (Schwabauer). Gorünür, onun hicablı olması, 2017-də qızıl medal qazanması bu posterdə şəklinin yer almasına səbəb olub. Amma...

Məsələ burasındadır ki, həmin legionerimizin elə həmin il dopinqdən istifadə edərək bu qızıl medalı qazandığı (halbuki İslamiadada 69 kq-da 5 rekord yeniləmişdi) məlum olmuşdu. Ona görə ağırlıqqaldırmada zəhmətkeş insanlardan olan federasiyanın vitse-prezidenti Tofiq Heydərov istefa verməli olmuşdu.

Cəzası artıq bitib. Maraqlandım, ağırlıqqaldırmanı atıb, artıq Bakıda Nərgiz adıyla fitnes məşqçiliyi ilə məşğuldur. Onda sual doğur: dopinqli idmançını, qızılı əlindən alınmış idmançını ora qoydurmaq kimin təfəkkürünün məhsuludur?

Bildiyimə görə, həmin assosiasiyanın İcraiyyə Komitəsində minimum 2 nəfər azərbaycanlı var. Onlardan biri millət vəkili, Atletika Federasiyasının vitse-prezidenti Könül Nurullayevadır. Bu adam hara baxır? Yaxınlarda MOK üzvlüyündən çıxarılıb, onu başa düşdük. Bəs o da bilmir ki, dopinqə düşmüş, üstəlik idmanı atmış şəxs rəsmi posterə vurula bilməz?

Ağırlıqqaldırma idmanını da başa düşdük. Hazırda ağırlıqqaldırma idmanı ölüb, öz sahəsində olmayanlar yerindədir, onu yerdən qaldıran lazımdır. Bu posta layiq idmançımız hazırda yoxdur. Bəs cüdo üzrə olimpiya çempionlarımız? Onları qoymaq olmazdımı?

İllah da karyerasını bitirən, lakin İslamiadanı qazanan idmançı qoymaq istəyirdinizsə, Rafael Ağayev və Hacı Əliyevi, özümüzünkü olanı qoymaq düzgün olmazdımı? Axı ölkə başçısı rəhbəri olduğu MOK-a üzvlüyə Alla Həsənova və bu 2 şəxsi qəbul etməklə idmanın onun nəzarətində olduğunu göstərdi bu yaxınlarda bizə.

Ona görə də hamı işinə vicdanla yanaşsın. Azərbaycan üçün çalışın, kreslo üçün yox. 2-3 vəzifədə olmaq hələ çox şey bilmək deyil.

Səbuhi Musa