Şahmat üzrə kişilər və qadınlar arasında ölkə çempionatının qalibləri bəlli olub.
Prosport.Az mükafatlandırma mərasimindən sonra qadınlar arasında çempion Günay Məmmədzadə, kişilər arasında gümüş mükafatçı Şəhriyar Məmmədyarov və qızıl medalçı Rauf Məmmədov, eləcə də Azərbaycan Şahmat Federasiyasının prezidenti Mahir Məmmədovun fikirlərini təqdim edir:
Günay Məmmədzadə: "Çempionat çox maraqlı keçdi. İlk dəfə idi ki, belə formatda oynayırdıq. Uduzan çempionatı tərk edirdi. Hər bir şahmatçı ən yaxşı oyununu göstərməyə çalışdı. Mənim üçün də kifayət qədər maraqlı və çətin oldu. Hər oyun digərindən maraqlı idi. Xüsusən də tay-breklər. Şadam ki, çempionatı qələbə ilə başa vurdum. Yarış asan deyildi, çünki illər boyunca birlikdə turnirlərdə çıxış etdiyiniz komanda yoldaşlarınıza qarşı oynayırsınız. Bu, oyundur, hər kəs əlindən gələni edir. Mən də özümə inanırdım".
Şəhriyar Məmmədyarov: "Mən bu çempionatda özümü qalib sayıram. Yarımfinaladək ardıcıl 6 oyunda qələbə qazandım. 15 ilə yaxındır ki, həyatımda belə uğurlu ardıcıllıq olmamışdı. Bu, çox çətindir. Öz nəticəmi gözəl qiymətləndirirəm. Bəzən 1-ci yeri tutursan, amma nəticədən razı qalmırsan. Bu dəfəki yarışda isə öz oyunumdan çox razı qaldım. Azərbaycan Şahmat Federasiyasının rəhbərliyinə təşəkkür edirəm ki, belə yarış təşkil etdi. Bunu həyata keçirmək çox çətindir. Qalır bundan sonra Avropa və dünya çempionatlarında Azərbaycanı yaxşı təmsil etmək. Növbəti il də bu cür ölkə çempionatı təşkil olunsa, yarışmaq istəyərəm".
Rauf Məmmədov: "Şokdayam, çünki tarixi Azərbaycan çempionatında qələbə qazanmaq çətin idi. Mənim üçün inanılmaz nəticədir. Çempionluğu ötən il rəhmətə gedən atama həsr edirəm. Çünki onun dünyadan köçməsinin 1 ili tamam oldu. Həmişə Azərbaycan çempionatında iştirak etməyimi istəyirdi. Yarımfinalda Teymur Rəcəbovu, finalda Şəhriyar Məmmədyarovu məğlub etmək, əlbəttə, çox çətindir. Bir az da bəxt lazımdır. Şükür Allaha ki, bəxtim də gətirdi. Həm Teymur, həm də Şəhriyarla oyun çətin keçdi. Hələlik dincəlmək istəyirəm. Çünki çox çətin yarış oldu. Daha sonra növbəti planlar barədə düşünəcəyəm".
Mahir Məmmədov: "Tarixi, Azərbaycanın ən güclü şahmatçılarının iştirakı, həm də ilk dəfə bu sistemlə keçirilən yarış başa çatdı. Bu gün qaliblər müəyyənləşdi. Finallar çox gərgin mübarizə şəraitində keçdi. Şəhriyar Məmmədyarov gözləniləndən fərqli olaraq 2-ci yeri tutdu. Baxmayaraq ki, final mərhələsində üstünlük nümayiş etdirmişdi. Bu, idmandır, səhv edən məğlub olur. Şahmatçıların hər birinin bu yarışda iştirakından məmnunuq. Deyilənə görə, çempionatı rekord sayda tamaşaçı canlı izləyib. Rəqəmlər də açıqlandı. Həm sosial şəbəkələrdə, həm də televiziya vasitəsilə geniş şəkildə işıqlandırıldı. Bu da bizi sevindirməyə bilməz. Ümidvarıq ki, gələcəkdə bütün çempionatlarımız belə keçəcək. Bütün şahmatçıları təbrik edirəm".
Qeyd edək ki, kişilərin yarışında mükafat fondu 60 min, qadınlarda isə 30 min manat idi. Rauf Məmmədov və Günay Məmmədzadə qalib olduğu üçün müvafiq olaraq 20 min və 10 min manat qazanıb.
