Azərbaycanın MMA döyüşçüsü Tofiq Musayevin "Global Fight" liqasındakı komandası bəlli olub.

Prosport.Az xəbər verir ki, o, bu təşkilatın bayrağı altında ilk döyüşünü apreldə keçirəcək. Komandaların iştirakı ilə baş tutacaq turnir BƏƏ, Braziliya və ya ABŞ-də təşkil olunacaq. İdmançılar 2 nəfərdən ibarət komandaların tərkibində döyüşəcək.

Musayev UFC-dəki çıxışı ilə tanınan rusiyalı Dəmir İsmaqulovla eyni komandada mübarizə aparacaq. İştirakçı komandalar müxtəlif şəhərlərin adlarını daşıyacaq.

Tofiq Musayevlə Dəmir İsmaqulov “Dubay” adlanan komandada yer alıb. Onları Həbib Nurməhəmmədovun məşqçisi olmuş Xavyer Mendes hazırlayacaq. Yarış iştirakçıları arasında UFC və “Bellator”dan tanınan Kevin Li, Sidney Autla, Patrik Pitbull, Lukas Martins, Ben Henderson, Toni Ferqyuson kimi məşhur idmançılar da olacaq.