"Murov Az Terminal" qadın voleybol komandası daha 3 transfer edib.

Prosport.Az-ın xəbərinə görə, bunlardan 2-si legioner, 1-i isə yerli oyunçu statusundadır.

Belə ki, son olaraq Slovakiyanın UNIZA klubunda çıxış etmiş 27 yaşlı serbiyalı Yelena Kokol və Xorvatiyanın "Riyeka" komandasından gəlmiş 26 yaşlı Lea Boban Bakı komandasına transfer olunub. Hər iki oyunçu blokçudur. 

Kokol ötən mövsüm Slovakiyada ən yaxşı blokçu seçilib. Xorvat Boban isə əvvəllər Belçika, Fransa, Monteneqro və Avstriyada da legioner karyerası yaşayıb. O, 2022/23 mövsümündə Monteneqronun "Xerseq Novi" komandası ilə həm çempionluğu, həm də ölkə Kubokunu qazanıb.

Bundan başqa, ötən mövsüm Azərbaycanın UNEC komandasında oynamış, "Azərreyl" və "Abşeron"un sabiq 20 yaşlı voleybolçusu Həyat Matuk da "Murov Az Terminal"da karyerasını davam etdirəcək.

Yeri gəlmişkən, ötən mövsüm Azərbaycanda oynamış 2 legionerin də yeni komandası müəyyənləşib. "Murov Az Terminal"da çıxış etmiş kubalı İvis May Vila İndoneziyanın "Yoqya Falkons", "Azərreyl"lə ölkə çempionu olmuş dominikanlı Vielka Peralta isə Türkiyənin "Sarıyer Bələdiyyəsi" komandasında çıxış edəcək.