Azərbaycanın rapid üzrə dünya çempionu Şəhriyar Məmmədyarov ABŞ-nin Nyu-York şəhərində keçiriləcək rapid və blits üzrə dünya çempionatlarına vaxtında qeydiyyatdan keçə bilməyib.

Bu barədə Prosport.Az-a Azərbaycan Şahmat Federasiyasının prezidenti Mahir Məmmədov məlumat verib.

FIDE-nin vitse-prezidenti də olan Mahir Məmmədov bununla belə onun yarışda iştirak edəcəyini bildirib: 

"O, vaxtında qeydiyyatdan keçə bilməmişdi. Biz onu "deadline" bitsə də, çətinliklə də olsa, FIDE-də qeydiyyatdan keçirə bildik. Şəhriyar həmin dünya çempionatında iştirak edə biləcək.

Sabah Skopyedə başlayacaq Avropa çempionatında iştirak edə bilməməsi isə London Klassik turnirində çıxışı ilə bağlıdır. Londondakı turnir Şəhriyar üçün daha vacibdir".

Qeyd edək ki, 29 noyabrda başlamış London Klassik turniri dekabrın 8-də başa çatacaq. Hazırda Məmmədyarov 8 şahmatçının mübarizə apardığı və "Arsenal" futbol klubuna məxsus "Emireyts" stadionunda keçirilən turnirdə 3 xalla 2-ci yerdədir.

Rapid üzrə dünya çempionatı 26-28 dekabrda, blits üzrə dünya çempionatı isə 30-31 dekabrda keçiriləcək. Azərbaycanı bu yarışda 15 idmançı (8 kişi və 7 qadın) təmsil edəcək. Bunlar kişilərdə Şəhriyar Məmmədyarov, Eltac Səfərli, Aydın Süleymanlı, Vasif Durarbəyli, Məhəmməd Muradlı, Vüqar Rəsulov, Read Səmədov, Vüqar Manafov, qadınlarda Günay Məmmədzadə, Gülnar Məmmədova, Xanım Balacayeva, Ülviyyə Fətəliyeva, Gövhər Beydullayeva, Zeynəb Məmmədyarova və Türkan Məmmədyarovadır.