Qadın həndbolçulardan ibarət Azərbaycan çempionu "Qarabağ"ın EHF Avropa Kubokunun 1/16 final mərhələsində Ukraynanın "Qaliçanka" klubu ilə oyunlarının harada baş tutacağı müəyyənləşib.

Prosport.Az-ın xəbərinə görə, belaruslu Sergey Kamburun yetirmələri Lvov təmsilçisini Mingəçevirdəki "Kür" Olimpiya Tədris-İdman Mərkəzinin zalında qəbul edəcək.

Buna səbəb Ukraynada müharibənin getməsi, həmin vaxt Bakıda COP29-la bağlı tədbirlərin olmasıdır. Bu səbəbdən tərəflər hər iki oyunun Mingəçevirdə baş tutması barədə razılığa gəlib.

Oyunlar 16-17 noyabr tarixlərində keçiriləcək. İlk oyun saat 14:00-da, cavab matçı 12:00-da baş tutacaqş

Qeyd edək ki, "Qaliçanka" artıq bu mövsüm 1 dəfə Azərbaycanda olub. Ukrayna təmsilçisi bu ay Bakıdakı "AHF Arena"da Avropa Kubokunun 1/32 final mərhələsi çərçivəsində "Azəryol"a 36:22 və 32:16 hesabı ilə qalib gələrək Bakı klubunu turnirdən kənarlaşdırıb.