Respublika Şahmat Mərkəzində təşkil edilən şahmatın rapid və blits növləri üzrə kişi və qadınlar arasında Azərbaycan çempionatı sona çatıb.

Prosport.Az xəbər verir ki, kişilərin yarışında 14 xal toplayan Eltac Səfərli ölkə çempionu olub. Çempiondan yarım xal geri qalan Vüqar Rəsulov 2-ci yeri tutub. Məhəmməd Muradlı yarışı 3-cü sırada başa vurub.

Qadın şahmatçıların yarışında 12.5 xal toplayan Azərbaycan milli komandasının üzvü Gülnar Məmmədova qızıl medala layiq görülüb. Eyni xala malik Zeynəb Məmmədyarova əlavə göstəricilərə görə 2-ci olub. Milli komandanın üzvü Xanım Balacayeva 12 xalla çempionatın bürünc medalını qazanıb.

Azərbaycan çempionatının bağlanış mərasimində qalib və mükafatçılara medal və diplomları Azərbaycan Şahmat Federasiyasının (AŞF) prezidenti Mahir Məmmədov, eləcə də AŞF-nin vitse-prezidenti Faiq Həsənov təqdim edib.

Qeyd edək ki, Azərbaycan çempionatının ümumi mükafat fondu 8 min manat təşkil edib. Qalib və mükafatçılar dünya çempionatında iştirak hüququ qazanıb. Ölkə çempionatlarında ilk 3 yeri tutan şahmatçılar 25 dekabr - 1 yanvar tarixlərində ABŞ-nin Nyu-York şəhərində təşkil olunacaq dünya çempionatına ezam olunacaq.