Qadın həndbolçulardan ibarət Azərbaycan komandalarından 2-si EHF Avropa Kuboku ilə vidalaşıb.

Prosport.Az-ın xəbərinə görə, bunlar "Azəryol" və son ölkə kubokunun qalibi "Kür" komandalarıdır.

"Azəryol" Ukraynanın "Qaliçanka" (Lvov) komandasına Bakıdakı "AHF Arena"da yenə böyük hesabla uduzub – 16:32. 1 gün əvvəl də rusiyalı Aleksandr Revvanın çalışdırdığı komandamız ukraynalılara 22:36 uduzduğundan, Bakı komandası turnirlə vidalaşıb.

Mingəçevirin "Kür" komandası isə bu dəfə böyük hesabla uduzub. Monteneqrolu Milorad Despotoviçin baş məşqçisi olduğu komandamız Yunanıstanın paytaxtı Afinada "İoanias"a (Nea İoniya) 22:33 məğlub olub. İlk matçda da 25:32 hesabı ilə məğlub olduğundan, "Kür" üçün avrokuboklar erkən başa çatıb.

Yalnız üzümüzü güldürən ölkə çempionu "Qarabağ" olub. Bakıdakı "AHF Arena"da Lüksemburqun "Red Boyz" (Diferdanj) komandasına 26:25 qalib gələn komandamız ilk görüşü də 27:24 üstün başa vurduğundan, 1/16 finala vəsiqə qazanıb.

Belaruslu baş məşqçi Sergey Kamburun çalışdırdığı "Qarabağ"ın növbəti rəqibi oktyabrın 15-də atılacaq püşklə müəyyənləşəcək. 1/16 finalın görüşləri 9/10-16/17 noyabr tarixlərində keçiriləcək.