Kişi və qadınlardan ibarət şahmat millimi Macarıstanın paytaxtı Budapeştdə təşkil olunan 45-ci Olimpiadada son görüşünü keçirib.

Prosport.Az xəbər verir ki, XI turda Braziliya ilə üz-üzə gələn kişi yığmamız 3:1 hesablı qələbə qazanıb. Bu nəticələrin ardından 16 xal toplayan seçməmiz 4 pillə irəliləyib və yarışı 8-ci sırada başa vurub. Rəqiblərini aşkar fərqlə qabaqlayan və yeganə uduzmayan komanda olan Hindistan 21 xalla Olimpiadanın qalibi olub. 17 xal toplamış ABŞ və Özbəkistan isə müvafiq olaraq gümüş və bürünc medalları qazanıb. 

Aydın Süleymanlı – Luis Paolu Supi 0,5:0,5
Nicat Abasov – Aleşandr Fayer 0,5:0,5
Rauf Məmmədov – Renato Kintilianu 1:0
Şəhriyar Məmmədyarov – Diequ Rafael Di Berardinu 1:0

XI turda yarışın favoriti Hindistanla üz-üzə gələn qadın yığmamız isə 0,5:3,5 hesabı ilə uduzub. Bu nəticə komandamızı 6 pillə geriyə salıb və millimiz 15 xalla yarışı 15-ci sırada başa vurub. Komandamıza qalib gələn Hindistan 19 xalla Ümumdünya Şahmat Olimpiadasını ilk sırada bitirib. Reytinqdə 10-cu olan Qazaxıstan 18 xalla gümüş, 7-ci olan ABŞ 17 xalla bürünc medalları qazanıb. 

Harika Dronavalli – Günay Məmmədzadə 1:0
Rameşbabu Vaişali – Ülviyyə Fətəliyeva 0,5:0,5
Deşmuk Divya – Gövhər Beydullayeva 1:0
Aqraval Vantika – Xanım Balacayeva 1:0

Qeyd edək ki, Teymur Rəcəbovun kapitanı olduğu kişilərdən ibarət millimiz 7 qələbə, 2 heç-heçə və 2 məğlubiyyət alıb. Yığmamız daha əvvəl Monteneqro (3:1), İordaniya (3,5:0,5), Finlandiya (3,5:0,5), Moldova (3:1) Qazaxıstan (3:1) və Kubanı (3:1) məğlub edib, Hindistan (1:3) ilə Litvaya (1,5:2,5) uduzub, İtaliya (2:2) və Yunanıstanla (2:2) isə heç-heçəyə razılaşıb.

Son Avropa 2-cisi olmuş qadınlardan ibarət millimiz isə 6 qələbə, 3 heç-heçə və 2 məğlubiyyət alıb. Mixail Şereşevskinin kapitanlıq etdiyi yığmamız daha əvvəl Sloveniya (3:1), Nikaraqua (4:0), Avstraliya (3:1), Vyetnam (2,5:1,5) İsveçrədən (4:0) üstün olub, Argentina, Ukrayna və İtaliya ilə heç-heçə edib (2:2), Qazaxıstana isə yenilib – 1:3.