Kişi və qadınlardan ibarət millilərimiz Macarıstanın paytaxtı Budapeştdə təşkil olunan 45-ci Ümumdünya Şahmat Olimpiadasında Qazaxıstanla üz-üzə gəlib.

Prosport.Az xəbər verir ki, hər iki görüş VII turda baş tutub.

Reytinqdə 12-ci olan kişilərdən ibarət millimizdə bu dəfə komandanın lideri Şəhriyar Məmmədyarov oynamayıb. Bununla belə, Teymur Rəcəbovun kapitanı olduğu yığmamız reytinqdə 41-ci olan rəqibinə 3:1 hesabı ilə qalib gələrək yarışda 5-ci qələbəsini əldə edib.

Aydın Süleymanlı – Denis Maxnev 1:0
Nicat Abasov – Qazıbəy Noqerbəy 0,5:0,5
Rauf Məmmədov – Əlişir Süleymanov 0,5:0,5
Məhəmməd Muradlı – Ramazan Jalmaxanov 1:0

Reytinqdə 6-cı olan qadınlardan ibarət millimiz isə 10-cu olan rəqibinə eyni hesabla uduzaraq Olimpiadada ilk məğlubiyyətini alıb.

Günay Məmmədzadə – Bibisara Assaubayeva 0,5:0,5
Ülviyə Fətəliyeva – Meruert Kamalidenova 0:1
Gövhər Beydullayeva – Kseniya Balabayeva 0,5:0,5
Gülnar Məmmədova – Alua Nurman 0:1

Qeyd edək ki, kişi yığmamız bu qələbə ilə xalını 10-a yüksəldib və 8 pillə irəliləyərək 14-cü yerə qalxıb. Bu gün növbəti rəqib İtaliya olacaq. Qadın yığmamız isə bu məğlubiyyətlə 9 pillə geriləyib və 19-cudur. Qadın yığmamız da bu gün İtaliya ilə qarşılaşacaq.

11:39

Azərbaycanın kişilərdən və qadınlardan ibarət milliləri Macarıstanın paytaxtı Budapeştdə təşkil olunan 45-ci Ümumdünya Şahmat Olimpiadasında Qazaxıstanla üz-üzə gələcək.

Prosport.Az xəbər verir ki, hər iki görüş VII turda baş tutacaq. 6 turdan sonra 10 xal toplayan qadınlardan ibarət komanda 10-cu yerdədir. Hindistan 12 xalla liderdir. Gürcüstan və Polşanın hərəyə 11 xalı var. Milli daha öncə Sloveniya (3:1), Nikaraqua (4:0), Avstraliya (3:1) və Vyetnamdan (2,5:1,5) üstün olub, Argentina və Ukrayna ilə heç-heçə edib – 2:2.

Kişilərdən ibarət seçmə isə 8 xalla 22-cidir. Komanda Monteneqro (3:1), İordaniya (3,5:0,5), Finlandiya (3,5:0,5) və Moldovanı (3:1) məğlub edib, Hindistan (1:3) ilə Litvaya (1,5:2,5) uduzub. Burada da Hindistan 12 xalla liderdir. Çin və Vyetnamın hərəyə 11 xalı var.

Teymur Rəcəbovun kapitanı olduğu kişilərdən ibarət yığmanın heyətində Şəhriyar Məmmədyarov, Rauf Məmmədov, Nicat Abasov, Aydın Süleymanlı və Məhəmməd Muradlı yer alıb.

Kapitanı Mixail Şereşevski olan qadınlardan ibarət kollektiv isə Günay Məmmədzadə, Gövhər Beydullayeva, Xanım Balacayeva, Ülviyyə Fətəliyeva və Gülnar Məmmədovadan ibarətdir.