Azərbaycanı Paralimpiya Oyunlarında təmsil edən cüdoçularımızdan yalnız 1-i medal qazana bilib.
Prosport.Az-ın xəbərinə görə, ikiqat paralimpiya, ikiqat dünya və doqquzqat Avropa çempionu İlham Zəkiyev (J1, +90 kq) bürünc medal üçün təsəlliverici görüşdə Daniel Knextə (Niderland) ipponla qalib gəlib.
Daha sonra o, 3-cü yer uğrunda görüşdə Qanbat Daştsereni (Monqolustan) məğlub edərək bürünc medala sahib çıxıb. Bu, 44 yaşlı idmançımızın 5-ci paralimpiya medalı olub. İlham Zəkiyev daha əvvəl Paralimpiya Oyunlarında 2 qızıl (2004, 2008) və 2 bürünc (2012, 2020) medal qazanıb.
Qadın cüdoçularımız isə medal qazana bilməyib. Xatirə İsmiyeva (J1, +70 kq) 45 yaşlı paralimpiya mükafatçısı Kristela Qarsiyaya (ABŞ) uduzaraq medalsız qalıb.
39 yaşlı paralimpiya və Avropa çempionumuz Dürsədəf Kərimova (J2, +70 kq) təsəlliverici görüşdə yerli idmançı, ikiqat Avropa mükafatçısı Presiliya Lezeyə (Fransa) qalib gəlib. O, bürünc medal uğrunda görüşdə Vanq Honqyu (Çin) ilə görüşdə 5 saniyəyə ippona düşərək medal qazana bilməyib.
13:18
Azərbaycanın digər 2 paracüdoçusu da Paris-2024 Yay Paralimpiya Oyunlarında mübarizəyə başlayıb.
Prosport.Az xəbər verir ki, əvvəlcə ilk görüşdə qalib gəlmiş Xatirə İsmiyeva (J1, +70 kq) 1/4 finalda türkiyəli paralimpiya və dünya mükafatçısı Nazan Akın Günəşə uduzub.
Digər paracüdoçularımız Dürsədəf Kərimova (J2, +70 kq) 1/4 finalda braziliyalı Rebeka de Souza Silvaya, kişi idmançımız İlham Zəkiyev (J1, +90 kq) isə fransalı Ceyson Qrondriyə məğlub olub.
Hər 3 paracüdoçu bürünc medal uğrunda təsəlliverici görüşlərə qatılacaq.
Qeyd edək ki, hazırda Azərbaycanın aktivində 3 qızıl, 2 gümüş və 3 bürünc medal var.
11:44
Azərbaycanın paracüdoçusu Xatirə İsmiyeva (J1 kateqoriyası) Fransada təşkil olunan Paris-2024 Yay Paralimpiya Oyunlarında 1/4 final mərhələsinə vəsiqə qazanıb.
Prosport.Az xəbər verir ki, 70 kq-dan yuxarı çəkidə yer alan idmançımız 1/8 finalda BƏƏ-dən olan Məryəm Əl-Danhani ilə üz-üzə gəlib.
Rəqibinə ipponla qalib gələn Xatirə İsmiyeva 1/4 finala yüksəlib.
Qeyd edək ki, Paralimpiada sabah başa çatacaq.