Azərbaycan milli komandası UEFA Millətlər Liqasının ilk turunda doğma meydanda İsveçə 1:3 hesabı ilə məğlub olub.
Prosport.Az xəbər verir ki, yığmamızın portuqaliyalı baş məşqçisi Fernandu Santuş matçdan sonra keçirilən mətbuat konfransında jurnalistlərin suallarını cavablandırıb:
– Oyuna hücumlarla başladıq, şanslarımız oldu. Təəssüf ki, həmin epizodlar qolla nəticələnmədi. Sonradan isə müdafiədən oynadıq. İsveç kifayət qədər güclü komandadır. Uşaqlar müdafiədə yaxşı oynamağa çalışdı. Ancaq İsveç bizi sıxırdı. Müdafiədə oynamağımıza baxmayaraq, hücum etmək üçün şans axtarırdıq. İlk hissənin sonunda bir neçə şansımız oldu ki, qol vuraq. Təəssüf ki, hücumumuz qolla nəticələnmədi. Eyni zamanda penaltini də əldən verdik. 2-ci hissədə yaxşı oynadıq. Qol şanslarımız var idi. Hücumları uğurlu sonlandıra bilmədik. Uşaqlar verdiyim tapşırıqları maksimum düzgün yerinə yetirməyə çalışdı. Bəzi səhvlərimiz oldu, rəqib də yararlanaraq qollar vurdu. Həvəsdən düşməmişik, görəcəyimiz işlər qarşıdadır. Kifayət qədər yaxşı nəticələr verə bilərik.
– Penalti zərbəsini vurmaq Ramil Şeydayevin qərarı idi?
– Mən oyundan qabaq da, penalti olanda da, Emin Mahmudov deyirdim.
– Görmək istədiyinizin neçə faizini gördünüz?
– Hücum oyunumuzdan 100% razıyam. Futbolçular tapşırıqlarımı yerinə yetirdi. Daim qol vurmağa cəhd edirdilər. Müdafiə planından isə 50% razıyam. Əslində, pis deyildik. Sadəcə müdafiənin təşkilində problem var idi və tez-tez top itirirdik. Azərbaycan millisi 4 səhvə yol verdi, İsveç isə 20 səhvə.
– Heyəti açıqlayanda demişdiniz ki, Azərbaycan millisi ölkənin bayrağı, himni üçün mübarizə aparmalıdır. Amma bir komanda ki himni oxumursa, o komanda necə Azərbaycan üçün mübarizə apara bilər?
– Mən sizinlə müəyyən mənada razılaşmıram. Hamı qələbə qazanmaq istəyirdi. Oyunçular əllərindən gələni etdi.
– Qapıçı seçimində həlledici amil nə oldu? Onun çıxışından razı qaldınız?
– Ondan razıyam. Bir çox epizodlarda bizi qol buraxmaqdan qurtardı. Amma bu, komanda oyunudur.
– Emin Mahmudovu əvəzləyəndə nəyi dəyişmək istəyirdiniz?
– Oyunun gedişatına uyğun dəyişiklik etdim.
– Penalti epizodunda Emin Mahmudovdan topu aldığı üçün Ramil Şeydayevi, yoxsa Eminin özünü cəzalandıracaqsınız?
– Komandadaxili məsələdir. Sabah bununla bağlı müzakirə aparacağıq.