"Araz-Naxçıvan" Azərbaycan Premyer Liqasının V turunda səfərdə "Sumqayıt"ı 1:0 hesabı ilə məğlub edib.

Prosport.Az xəbər verir ki, Naxçıvan təmsilçisinin məşqçisi Rasim Ramaldanov matçdan sonra keçirilən mətbuat konfransında jurnalistlərin suallarını cavablandırıb:

– Sumqayıtda oynamaq həmişə xoşdur. Dinamik və hücum futbolu oldu. Futbolçularımıza təşəkkür edirəm, yaxşı oynadılar. Qoldan sonra bir az geriyə çəkildik. Bəzi şeylər alınmırdı. Amma qələbə həmişə yaxşıdır.

– Hesabda önə keçəndən sonra sanki komanda arxayınlaşır. Bunun səbəbi nədir?
– Bu bizə siqnal oldu. Komanda qol vurandan sonra müdafiəyə oturur. Vaxtımız var. Bunun üzərində işləyəcəyik. Qoldan sonra da dinamik futbol oynamağa çalışacağıq.

– Milli fasilə komandaya necə təsir edəcək?
– Yaxşı və ya pis olacağı bilinmir. Nöqsanlarımız çoxdur. Yeni oyunçular bir-birinə uyğunlaşmayıb. Çalışacağıq ki, nöqsanları aradan qaldıraq. Bu mənada fasilə xeyrimizə olacaq.

– Qarşınıza hansı hədəf qoyulub?
– Konkret hədəf qoymayıblar. Amma biz bacardığımızın ən yaxşısını etmək istəyirik. Avrokuboklara vəsiqə qazanılsa, lap yaxşı olar. Alınmasa da, yolumuza davam edəcəyik.