"Turan Tovuz" Azərbaycan Premyer Liqasının V turunda doğma meydanda "Səbail"i 1:0 hesabı ilə məğlub edib.

Prosport.Az xəbər verir ki, qərb təmsilçisinin baş məşqçisi Qurban Berdiyev matçdan sonra keçirilən mətbuat konfransında jurnalistlərin suallarını cavablandırıb:

– Oyuna pis başladıq. İlk 15 dəqiqə ərzində üstünlüyü rəqibə verdik və bütün mövqeləri uduzduq. Sonra hissənin axırına kimi vəziyyəti yaxşılaşdırdıq. 1-dən çox da qol vura bilərdik. 2-ci hissədən razı qalmadım. Nə hücumda, nə də müdafiədə yaxşı oynadıq. Səbəbini axtaracağıq. Bu ya qol buraxmaq qorxusundandır, ya da başqa psixoloji məqamdır.

– Fərid Yusifli kobud səhvə yol verdi. Sizcə, Premyer Liqada oynayan futbolçu belə səhvə yol verə bilər?
– Narazılığım Fəridə yox, Şəhriyar Əliyevə idi. Şəhriyar həmin məqamda ona ötürmə verməli deyildi. Fərid də daha rahat oynamalı idi.

– "Turan Tovuz"un tarixində ilk dəfə milliyə oyunçular dəvət olundu. Buna münasibətiniz necədir?
– İlk dəfə olduğunu bilmirdim. Xoş hisslər keçirirəm ki, həm gənc yığmalara, həm də əsas milliyə futbolçularımız dəvət olunub.

– Sizin üçün nəticə önəmlidir, yoxsa baxımlı futbol? "Turan Tovuz"un baxımlı futbol oynadığını düşünürsünüz?
– İstənilən məşqçi üçün nəticə önəmlidir. Amma tapşırıqları yerinə yetirmirsənsə, nəticələr daimi olmaz. Bu gün qələbə var. Amma istədiyimiz kimi oyun olmadı. İstənilən halda qələbə qələbədir. Çünki azarkeşlər bundan zövq alır.

– Bura gələndə inanırdınız ki, 5 turdan sonra qol buraxmadan lider olacaqsınız?
– Azərbaycan futbolu haqda məlumatım yox idi. Futbolçulara təşəkkür edirəm. Onların sayəsində bu nəticələr əldə olunur.

– Milli fasilə komandanı tonusdan sala bilər?
– Yox. İstənilən halda fasilə lazımdır. Bu bizə vaxt verəcək ki, səhvlərimizin üzərində işləyək.

– Transfer gözlənilir?
– Hələ ki, dəqiq bir şey yoxdur. Bu sualları mənə yox, rəhbərliyə ünvanlayın.