Xorvatiyanın "Dinamo" (Zaqreb) klubu Çempionlar Liqasının pley-off mərhələsinin cavab oyununda sabah Bakıda "Qarabağ"ın qonağı olacaq.
Prosport.Az xəbər verir ki, Zaqreb təmsilçisinin baş məşqçisi Sergey Yakiroviç matçdan öncə keçirilən mətbuat konfransında jurnalistlərin suallarını cavablandırıb:
- İlk matçda 3:0 hesabı ilə qalib gəlməyimizə baxmayaraq, bu oyuna ciddi hazırlaşmışıq. Rəqibimiz çox güclüdür. Onların hazırlıq səviyyəsi kifayət qədər yüksəkdir. Bütün bunları nəzərə alaraq, əsasən müdafiəni gücləndirmək şərtilə, oyunçuların hazırlıq səviyyəsinin yüksək formada olmasına çalışmışıq.
- Sabah təyyarənin havaya qalxması üçün 90 dəqiqə nəzərdə tutulub, yoxsa penaltilər seriyası da nəzərə alınıb?
- Bunun üçün konkret vaxt nəzərdə tutulmayıb. Oyunun gedişatından asılı olaraq görəcəyik.
- Hesab edirsiniz ki, "Maksimir"dəki nəticə ədalətli deyildi?
- Nəticənin ədalətli olub-olmaması kimi şərh verə bilmərəm. Biz oyunda daha çox ona baxırıq ki, rəqib qol vurmaq üçün bizə nə qədər şans yaradır. Nəticə də yaranan vəziyyətlərdən asılı olur.
- "Qarabağ" "Ludoqorets"ə evdə uduzsa da, səfərdə qalib gələrək rəqibin baş məşqçisini istefaya göndərdi. Qorxmursunuz ki, sabah da siz böyük hesabla uduzarsınız və istefaya göndərilərsiniz?
- Həmin məşqçinin istefası barədə məlumatım yoxdur. Böyük ehtimalla artıq təqaüd yaşı çatdığına görə istefa verib. Mənim elə fikrim yoxdur. Bu komanda ilə yeni başlamışam və iddialıyam. Yaxşı nəticələrin olacağına inanıram. Komanda ruhuna, oyunçulara güvənirəm. Belə halın yaşanacağını qətiyyən düşünmürəm.
- Yaxın keçmişdə Mahir Emrelini sərəncamınızda görmək istəmədiniz və o, komandadan ayrıldı. Buna səbəb nə idi?
- Mən bu komandada bir ildir ki, baş məşqçiyəm. Bu müddət ərzində Emrelinin potensialını görməyə vaxtım oldu. Lakin qışdakı zədəyə görə yazda oyunlara çıxa bilmədi. Daha sonra zədə yaya qədər uzandı. Bir çox oyunlarda iştirak edə bilmədi. Onun da bəxti gətirdi ki, "Nürnberq"ə transfer oldu. Mahirlə sağollaşmağımızda heç bir pis səbəb yox idi.
- Bakıya hansı nəticə üçün gəlmisiniz?
- Bizi daha da irəli aparacaq nəticəni əldə etmək üçün gəlmişik. Heç-heçə, qalibiyyət, məğlubiyyət kimi adlandıra bilmərəm. Niyyətimiz daha da irəli getməkdir.