"Qarabağ"ın müdafiəçisi Bəhlul Musatafazadə UEFA Çempionlar Liqasının pley-off mərhələsinin "Dinamo" ilə cavab matçından öncə keçirilən mətbuat konfransında fikirlərini bölüşüb. Prosport.Az xəbər verir ki, 27 yaşlı futbolçu jurnalistlərin suallarını da cavablandırıb.

- Sabah bizi gərgin və maraqlı oyun gözləyir. Ümidliyik. Hədəfimiz Çempionlar Liqasının əsas mərhələsinə yüksəlməkdir. Oyuna yaxşı hazırlaşmışıq. Sabah hər şeyi edəcəyik ki, mərhələni keçək.

- "Dinamo" ilə birinci oyundan sonra komandanın müdafiə xətti tənqidlərə məruz qaldı. Bu, sizə necə təsir edir?

- Tənqidləri normal qarşılayırıq. Qol buraxırıqsa, müdafiənin də səhvi var. Çalışırıq ki, səhvləri təhlil edib, nəticə çıxaraq. Təzyiq yaratdığını düşünmürəm. Çünki bu da futbolun bir parçasıdır. Əsas odur ki, həmin səhvlərdən nəticə çıxaraq və növbəti oyunlarda təkrarlamayq.

- Üzərinizdə hansısa təzyiq var?

- Xeyr. Çünki artıq bir neçə turdur ki, Çempionlar Liqasında oynayırıq. Təcrübəmiz var. Hər kəs sakitdir, qələbəyə inanır. Ən önəmlisi, daha təmkinli olmaqdır. Özüm də yaxşıyam. Daha yaxşı oyun göstərməyə çalışacağıq".