Çimərlik futbolu üzrə Azərbaycan milli komandası Bakıda təşkil edilən təlim-məşq toplanışı çərçivəsində ilk yoxlama görüşünü keçirib.

Prosport.Az xəbər verir ki, yığma Belarus seçməsi ilə qarşılaşıb. Su İdmanı Sarayının çimərlik futbolu meydançasında baş tutan qarşılaşmada rəqib 4:2 hesablı qələbə qazanıb. Azərbaycan millisinin heyətində qolları Ramil Əliyev və İsa Zeynallı vurub.

Komandalar bu gün 2-ci yoxlama görüşündə üz-üzə gələcək. Eyni məkanda təşkil olunacaq qarşılaşma saat 18:00-da başlayacaq.

Qeyd edək ki, avqustun 1-dən yeni baş məşqçi Sahib Məmmədovun rəhbərliyi altında təlim-məşq toplanışına başlayan Azərbaycan yığmasının hazırlıq prosesi ayın 31-dək davam edəcək.