Çimərlik futbolu üzrə Azərbaycan milli komandası Gürcüstanın Batumi şəhərində keçirilən Avropa çempionatının (EBSL) seçmə mərhələsini çempion kimi başa vurub.

Prosport.Az xəbər verir ki, yığmamız final görüşündə Latviya millisini 4:0 hesabı ilə məğlub edərək B Liqasının qalibi adını qazanıb. Komandamızın heyətində Elşad Manafov iki, Orxan Məmmədov və Ramil Əliyev isə hərəyə bir qolla yadda qalıblar.

Bu nəticə sayəsində Azərbaycan millisi növbəti mövsümdən Avropa çempionatının A Liqasında çıxış etmək hüququ əldə edib.

Fərdi mükafatlarda da millimizin üzvləri fərqləniblər. Elçin Qasımov turnirin ən yaxşı qapıçısı, Sahib Məmmədov isə ən yaxşı oyunçusu seçilib.