Azərbaycan millisinin sabiq baş məşqçisi Nikola Yurçeviç UEFA Çempionlar Liqasının pley-off mərhələsində “Dinamo” və "Qarabağ" komandaları arasında keçiriləcək oyunlardan danışıb.

Prosport.Az xəbər verir ki, "Sportske novosti"yə açıqlama verən xorvatiyalı mütəxəssis Qurban Qurbanov barədə də fikirlərini bölüşüb:

"Şans baxımından "Dinamo”ya üstünlük verirəm, amma “Qarabağ” da çox yaxşıdır. Çempionatda üstünlüyü baxımından “Dinamo”ya bənzəyir, həm də avrokuboklarda yaxşı nəticələri var. “Bayer”lə matçlarda nə qədər güclü olduqlarını göstərdilər, son dəqiqələrdə sözün əsl mənasında Avropa Liqasından uzaq qaldılar. “Qarabağ”ın çox yaxşı skautları var, əla əcnəbi oyunçular gətirirlər. Avrokubok oyunlarında əsas heyət 2-3 yerli futbolçudan ibarətdir. Bir vaxtlar “Riyeka” ilə çempion olmuş Marko Vesoviç hələ də Azərbaycan çempionunun sıralarındadır.

Qurban Qurbanov "Qarabağ" üçün böyük üstünlükdür. O, Xosep Qvardiolanın oyun üslubunun pərəstişkarıdır. İmkan daxilində öz üslubunu “Qarabağ”da reallaşdırmağa çalışır. Ağdam təmsilçisi texnikalı futbol oynayır, dominantlığı və topa sahib olmağı sevir. “Dinamo” heç bir halda “Qarabağ”a yuxarıdan aşağı baxmalıdır. Onların  beynəlxalq təcrübəsi böyükdür. Bununla belə, məncə, “Dinamo”nun şansları daha çoxdur. Amma yenə də başa düşmək lazımdır ki, “Qarabağ” asan rəqib deyil. Onlar bunu evdə uduzduqdan sonra “Ludoqorets”i məğlub edəndə göstəriblər. Rəqib komandada Juninyu, Abdullah Zubir, Yassin Benzya və Leandro Andradeni qeyd edərdim.

"Qarabağ"ın çempionatdakı oyunlarına baxmağa bir neçə min adam gəlir, amma avrokuboklarda oynayanda stadion dolur. Stadiondakı atmosfer əla və ruhlandırıcı ola bilər. İştirak etdiyim “Qarabağ” – “Sevilya” matçını xatırlayıram, alqışlar gurultulu və əla idi”.