Xorvatiyanın "Dinamo" klubunun müdafiəçisi Stefan Ristovski Çempionlar Liqasının pley-off mərhələsində "Qarabağ"a qarşı keçirəcəkləri ilk oyundan danışıb. 

Prosport.Az xəbər verir ki, Zaqreb təmsilçisinin aparıcı üzvü Ağdam klubu ilə matça ruh yüksəkliyi ilə çıxacaqlarını bildirib:

"Şibenik"ə qarşı əla oynadıq. Düzgün yanaşmamız var idi. Ciddi müdafiə oyunu nümayiş etdirdik və aktiv olduq. Nəticədən və oyundan çox məmnunam. Gələn həftə Çempionlar Liqasında mübarizəyə start verəcəyik. İnanıram ki, "Qarabağ"la matçda da eyni ruh yüksəkliyi ilə oynayacağıq".

Komandalar arasında ilk oyun avqustun 20-də “Maksimir” stadionunda keçiriləcək və Bakı vaxtı ilə saat 23:00-da başlayacaq.