"Neftçi" Azərbaycan Premyer Liqasının III turunda "Sabah"a 0:2 hesabı ilə məğlub olub.
Prosport.Az xəbər verir ki, "ağ-qaralar"ın baş məşqçisi Roman Qriqorçuk oyundan sonra keçirilən mətbuat konfransında jurnalistlərin suallarını cavablandırıb:
- Siz bura gələndə çoxları düşünürdü ki, "Neftçi" "Qarabağ"la çempionluq mübarizəsi aparacaq. Amma 3 turdan sonra komandanın nəticələri və oyunu ümidverici deyil. Bu durumu necə şərh edərdiniz?
- Əlbəttə ki, haqlısınız. Bu gün məğlub olduq, istədiyimiz kimi oynamırıq. Hər şey neqativ görünür. 3 tur ərzində azarkeşlərimizə qələbə baxş edə bilməmişik.
- Mətbuatda belə xəbərlər var ki, klub rəhbərliyi ilə aranızda fikir ayrılığı yaranıb, istefa vermək istəyirsiniz. Bu barədə nə deyə bilərsiniz?
- Mətbuatda bu cür söz-söhbətlərin olduğunu indi öyrəndim. Bu məsələni ümumiyyətlə şərh edə bilmərəm. Bu həftə ərzində rəhbərliklə danışığımız belə olmayıb.
- Yeni transferlərin oyunundan razısınız?
- Yeni futbolçuların gəlməsi sevindiricidir. Biz bunun üzərində çox iş görürük. Hələ transferlərimiz bitməyib, yeni oyunçular gələcək. Hər futbolçunun performansını müzakirə etmək üçün ən azı 5-6 tur lazımdır. Bəzi oyunçular obyektiv səbəbdən tam hazır deyillər. Son oyunlarını may ayında keçiriblər. Yavaş-yavaş komandaya uyğunlaşmağa cəhd göstərirlər.
- Transferlər sırf sizin seçiminiz əsasında edilir?
- Mənə oyunçuların siyahısı verilir. Onlara baxıb seçimlər edirik. İstisna hal kimi Andrey Ştoqrini qeyd edərdim. Mənim əvvəlki komandamda çıxış edib. Sırf mənim təqdimatım əsasında "Neftçi"yə gəlib. Hər gələn futbolçu haqda klubun mətbuat xidmətinə verdiyim açıqlamanı indi də təsdiqləyirəm.
- "Qəbələ"yə yeni gəldiyiniz vaxtda tanıdığınız futbolçuları komandaya dəvət etmişdiniz. "Neftçi"də isə bu halı görmürük. Bu, nə ilə bağlıdır?
- Səmimi desəm, heç Ştoqrini də gətirmək istəməzdim. Amma artıq bu baş verib. Klubda bir sistem var, oyunçuları izləyirlər, təhlil edirlər. Məşqçi də bunun əsasında seçim edir. Sivil yoldur, buna da hörmətlə yanaşıram. Antonovu "Qəbələ"yə gətirəndə şayiələr yayılmışdı ki, mənim yaxın qohumumdur.
- Qara Qarayevi əvəzedici heyətə göndərməyinizin səbəbi nədir?
- Qara həm yaxşı insan, həm yaxşı futbolçudur. Uzun ilıər Azərbaycan milli komandasının şərəfini qoruyub, ölkənin ən böyük klublarından birində çıxış edib. Onunla səmimi söhbət etmişəm. Qaraya dəfələrlə demişəm ki, onu əsas heyət oyunçusu kimi görmürəm. Əvəzedici heyətdə olması klubla futbolçu arasında olan məsələdir. Mən bu haqda şərh verə bilmərəm.
- Transferlərə baxanda belə görünür ki, sizə verilən siyahıdan pisin yaxşısını seçmək məcburiyyətində qalmısınız. Bu duruma neçə müddət tab gətirə biləcəksiniz?
- Çalışdığım hər futbolçunu çox istəyirəm, hamısına hörmətlə yanaşıram. İstəyirəm onların yaddaşında yaxşı qalım.
- 90 dəqiqə ərzində qapıya dəqiq zərbə olmamasını necə şərh edərdiniz?
- Əvvəldə də bildirdim ki, oyundan narazıyam. Bundan daha yaxşı çıxış etməliyik.