"Ludoqorets"in UEFA Çempionlar Liqasının III təsnifat mərhələsinin cavab oyununda "Qarabağ"a 2:7 hesablı məğlubiyyəti Bolqarıstan klubları üçün avrokubokların ev matçlarında antirekorddur.

Prosport.Az xəbər verir ki, bu ölkənin heç bir təmsilçisi indiyədək doğma meydanda 1 oyunda öz qapısından bu qədər top buraxmayıb.

"Qarabağ"la görüşə kimi ən mənfi göstərici 1977-ci ildə qeydə alınmışdı. Sofiya "Lokomotiv"i Kuboklar Kubokunda "Anderlext"ə 1:6 hesabı ilə uduzmuşdu. Bundan başqa, UEFA Kubokunda "Slaviya" 1988-ci ildə "Partizan"dan, "Liteks" isə 1998-ci ildə Moskva "Spartak"ından 5 cavabsız top buraxıb.

Amma "Qarabağ"la oyundakı nəticə "Ludoqorets"in avrokuboklardakı ən ağır məğlubiyyəti deyil. Razqrad təmsilçisi ötən mövsüm Konfrans Liqasının qrup mərhələsində Danimarkanın "Norşelan" komandasına səfərdə 1:7 hesabı ilə uduzub. Komanda həmçinin 2 dəfə səfərdə 0:6 hesabı ilə uduzub. Bu, 2016-cı ildə Çempionlar Liqasında "Arsenal"a, 2019-cu ildə isə Avropa Liqasında "Espanyol"a qarşı oynanılarkən baş verib.

Bolqarıstan klublarının ən böyük hesablı məğlubiyyəti isə 24 il əvvəl olub. "Velbajd" klubu 2000-ci ildə İntertoto Kubokunda evdə 2:0 qalib gəlsə də, səfərdə Çexiya "Siqma"sına 0:8 uduzub.