"Kəpəz" Azərbaycan Premyer Liqasının II turunda səfərdə "Qarabağ"a 0:3 hesabı ilə məğlub olub.

Prosport.Az xəbər verir ki, Gəncə təmsilçisinin baş məşqçisi Adil Şükürov oyundan sonra keçirilən mətbuat konfransında jurnalistlərin suallarını cavablandırıb:

- Yeni qurulan komandayıq. Yeni oyunçular gəlib. Komanda formalaşdırmaq müəyyən vaxt alacaq. Belə nəticələrin olması təbiidir. Komandanı daha yaxşı vəziyyətə gətirməyə çalışırıq. Ötənilki kimi mübariz kollektiv formalaşdırmaq istəyirik. Bu yöndə də işimiz davam edir.

- Danışıq apardığınız futbolçu var?

- Bir nəfər var. Keverton bizimlədir. Çalışacağıq ki, gələn həftə sifariş edək, oyunlarda iştirak etsin.

- Komandanı qurmaq üçün nə qədər vaxt lazımdır?

- Komandaya inanmalıyıq. "Kəpəz" elə-belə klub deyil, tarixi var. Azarkeş də, biz də bu məğlubiyyəti qəbul etmirik. Məğlubiyyətlər acıdır. Futbolçuların psixoloji durumlarını düzəltmək istəyirik. Hər kəs istəyir ki, əvvəlki komanda qurulsun. Ötənilki komandanın demək olar ki, 80-90 faizi yoxdur.

- "Kəpəz"in oyunçularını Premyer Liqanın digər klubları götürür. "Zirə" üç futbolçunuzu transfer etdi. Ola bilər ki, bu fubtolçularla uzunmüddətli müqavilə imzalayasınız?

- Bu yöndə də işlərimizi aparırıq. Əksər oyunçularla 1+1 şərtilə müqavilə imzalayırıq ki, gələn il komandanı gücləndirək. Futbolçularla 3 illik müqavilə imzalamaqla deyil, müqavilə şərtlərini yerinə yetirmək lazımdır. Komandaya dəstək olmalıdır. Olmayanda, istəyirsən 10 illik müqavilə imzala, əhəmiyyəti qalmır. Futbolçunu saxlamaq üçün müəyyən artım olmalıdır. Ödəyə bilmiriksə, komandanın aparıcı oyunçuları gedir. Tam başqa fikirləşirdik, başqa şeylər qarşımıza çıxdı. Hər kəsdən də istəyirəm ki, mübariz "Kəpəz" üçün səbirli olsunlar.