Azərbaycan Premyer Liqası daha bir mövsüm “Misli”nin sponsorluğu ilə keçiriləcək.

Prosport.Az xəbər verir ki, Peşəkar Futbol Liqası (PFL) ilə Azərbaycanın qanuni lotereya təşkilatçısı və idman mərc oyunları operatoru “Azəlotereya” ASC-nin “Misli” brendi arasında titul sponsorluğuna dair müqavilənin müddəti uzadılıb.

Razılığa əsasən, 2024/2025-ci illər mövsümündə də “Misli” Azərbaycan Premyer Liqasının əsas sponsoru olacaq və ölkə çempionatı “Misli Premyer Liqası” adlanacaq. Tərəflər arasında müqavilə rəsmilərin iştirakı ilə keçirilən tədbirdə imzalanıb. İmzalanma mərasimində AFFA-nın prezidenti Rövşən Nəcəf, “Dəmirörən Holdinq”in İdarə Heyətinin sədri Yıldırım Dəmirörən, Türkiyə Respublikasının Azərbaycan Respublikasındakı fövqəladə və səlahiyyətli səfiri Cahit Bağcı, AFFA, PFL, “Azerlotereya” və futbol klublarının rəsmiləri iştirak edib.

Tədbirdə çıxış edən AFFA-nın prezidenti Rövşən Nəcəf ilk olaraq “Qarabağ”, “Sabah” və “Zirə” klublarının avrokuboklarda mərhələ keçmələri və Azərbaycan idmançılarının “Paris-2024” Yay Olimpiya Oyunlarında 2 qızıl medal qazanmaları münasibətilə təbriklərini çatdırıb. AFFA-nın prezidenti “Misli” ilə əməkdaşlığın çempionatın daha da maraqlı keçməsi, rəqabətin artması və ən əsası azarkeşlərin stadionlara gəlməsinə kömək edəcəyini bildirib. O, digər şirkətləri və iş adamlarını da Azərbaycan futboluna dəstək olmağa çağırıb.

Mərasimdə çıxış edən “Dəmirörən Holdinq”in İdarə Heyətinin sədri Yıldırım Dəmirörən də anlaşmanın Azərbaycan futbolunun beynəlxalq arenada daha da uğurlu təmsil olunmasına töhfə verəcəyinə inamını ifadə edib. Əməkdaşlığın futbolun inkişafı üçün önəmli layihələrin həyata keçirilməsinə xidmət edəcəyini bildirib.

Daha sonra Türkiyə Respublikasının Azərbaycan Respublikasındakı fövqəladə və səlahiyyətli səfiri Cahit Bağcı idmanın ictimai həyatın hər sahəsindəki əhəmiyyətinə diqqət çəkərək idman klublarının dəstəklənməsi və idmanın bütün növlərinin inkişafı istiqamətində səylərin artırılmasının vacibliyi ilə bağlı fikirlərini bölüşüb və bu baxımdan “Dəmirörən Holdinq”in iştirak etdiyi sponsorluq müqaviləsini son dərəcə dəyərli və mənalı hesab etdiyini vurğulayıb.

Sonda tərəflər müqaviləyə imza atıb. Müqaviləni “Azərlotereya” ASC-nin İdarə Heyətinin sədri Osman Karakuş və PFL prezidenti vəzifəsini müvəqqəti icra edən Elgiz Abasov
imzalayıb.

Qeyd edək ki, Misli Premyer Liqası bu gün start götürür.