"Sabah" UEFA Avropa Konfrans Liqası II təsnifat mərhələsinin cavab oyununda İsrailin "Makkabi" (Hayfa) klubunu penaltilər seriyasında məğlub edərək növbəti raunda yüksəlib.
Prosport.Az xəbər verir ki, Masazır təmsilçisinin baş məşqçisi Krunoslav Renduliç matçdan sonra keçirilən mətbuat konfransında jurnalistlərin suallarını cavablandırıb:
– İlk olaraq onu demək istəyirəm ki, bugünkü oyundan qabaq heç kəs bizə 1% də şans vermirdi. İlk anlardan inanırdım ki, maksimumumuzla oynasaq, mərhələni keçə bilərik. Səmimi deyim ki, "Makkabi" bu gün bizdən daha yaxşı idi. 1 oyunda favorit olan komandaya qalib gələ bilərsən. Ancaq 2 matçda favorit komandaya qalib gəlmək çox çətindir. Lakin biz bunu etdik. Oyunçularımı təbrik edirəm, qəhrəmandırlar, aslanlar kimi döyüşdülər. Nəticədə də güclü rəqibə qalib gələrək mərhələ adlamağa layiq idik.
– Qalibi mühakimə etməzlər. Mən də etmirəm. Bəs siz 6 qola görə özünüzü mühakimə edirsiniz?
– 6 qol buraxmışıq, amma biz də 6 qol vurmuşuq. 2 matçda biz 6 qol vurduq. 2 oyundan sonra biz mərhələni keçdik. Heç kəs mərhələdən öncə rəqibi keçəcəyimizə şans vermirdi.
– Dediniz ki, "Makkabi" oyunun favoritidir. Rəqibi keçməyinizə nə səbəb oldu?
– Biz inanırdıq. Oyundan öncə komandama inanırdım. Məğlubedilməz komanda yoxdur. "Real" da uduzur. Niyə də uduzmasın?!
– Bayaq dediniz ki, "Makkabi" ilə görüşdən əvvəl bizə 1% şans verilmirdi. Bəs növbəti mərhələdə favorit sizsiniz?
– Sabahdan etibarən rəqib haqda fikirləşəcəyik.
– Müdafiə xəttində problemlər olduğu görünürdü. Növbəti mərhələdə bu yöndə işlər görəcəksiniz? Transfer edəcəksiniz?
– Müdafiəni sadəcə arxada oynayan 4 futbolçuya bağlamaq istəmirəm. Bütün komanda müdafiə olunmalıdır. Biz bu gün müdafiədə çox pis idik. Ən azından 1 müdafiəçi gətirmək istəyirik. Çünki 3 cəbhədə mübarizə aparacağıq. Bu haqda düşünürük.
– Penaltilər seriyasında 5-ci zərbəyə Namik Ələskərovun adını qeyd etmişdiniz?
– Keçən il keçən ildə qalıb. Öncəki klubumda da belə hallar yaşanmışdı. Namikdən soruşdum ki, penaltini vurmaq istəyirsən? "Yox" dedi. 5-ci penaltini Boyan Letiç vuracaqdı.
– Premyer Liqanın ilk turunda "Şamaxı" ilə görüşün təxirə salınması üçün PFL-ə müraciət edəcəksiniz?
– Oyunun təxirə salınması mümkün deyil. Amma ola bilər ki, evdə oynayaq. Məndən soruşmayın ki, həmin matçda kimlər oynayacaq. Sabah baxacağıq ki, kim yaşayır, kim canlıdır (gülür). Amma məcbur 11 nəfər oynadacağıq.