Azərbaycanda özümü yad hesab etmirəm.
Prosport.Az xəbər verir ki, bu sözləri yay transfer dövründə “Araz-Naxçıvan”la anlaşan və təxminən 1 illik fasilədən sonra yenidən Azərbaycana qayıdan Ramon Maşado klubun rəsmi saytına müsahibəsində deyib.
Braziliyalı futbolçu bildirib ki, komanda yeni olsa da, Azərbaycan ona yad ölkə deyil: “Əvvəllər də burada oynamışam, iki klubun formasını geyinmişəm. “Araz-Naxçıvan” yeni çağırışdır. Mən də bu dəvəti qəbul etdim, yenidən özümü bu ölkədə sınamaq qərarına gəldim. Ailəm də Azərbaycanı çox sevir. Burada yaşamağımız üçün heç bir problem yoxdur. Buraya hazır gəlmişdim. Çünki Malayziya çempionatında çıxış edirdim və mütəmadi oynayırdım. Çempionat oyunları başa çatdıqdan sonra istirahət etmədim, birbaşa komandanın Türkiyədəki düşərgəsinə yollandım, ikinci yoxlama matçında meydana çıxdım. Ona görə uyğunlaşmaq və hazırlıq baxımından hansısa çətinliyim olmadı. Baş məşqçini də tanıyıram, vaxtilə birgə çalışmışıq. Bir neçə futbolçu var, onlarla da başqa komandada çıxış etmişik. Yəni özümü yad hesab etmirəm”.
O, Azərbaycan Premyer Liqasının ilk turunda “Qarabağ”la keçirəcəkləri oyun barədə də fikirlərini bölüşüb: “Asan matç olmayacaq. Rəqib haqda geniş danışmağa ehtiyac yoxdur. Çünki bu komanda illərdən bəri Azərbaycan çempionu olur, avrokuboklarda uğurlu çıxışı ilə seçilir. Heyətində keyfiyyətli futbolçular cəmləşib. Amma bizim də əla kollektivimiz var. Yayda komandaya xeyli futbolçu cəlb olunub ki, hər biri kömək edəcək güc və səviyyədədir. Maraqlı görüş olacaq. Mövsümün startıdır, uğurlu nəticə qazanmalıyıq. Bunu hər kəs istəyir. Çünki qarşımıza məqsəd qoyulub”.
33 yaşlı hücumçu komandanın avrokuboklara vəsiqə qazanmaq uğrunda mübarizə aparacağını söyləyib: “Düzdür, digər komandaların durumunu bilmirəm. Çünki buradan getdikdən sonra çempionatı izləmək imkanım olmurdu. Oyunlar, saat fərqi və s. mane olurdu. Amma burada olan dostlarımdan ümumi məlumat alırdım. Stadionları görmüşəm, hamısına bələdəm. Təbii ki, bizi asan oyunlar gözləmir. Hər kəs mübarizə aparacaq”.
Qeyd edək ki, Ramon Maşado qarşıdakı 1 ili “qırmızı-ağlar”ın heyətində keçirəcək. Oyunçu “Araz-Naxçıvan”a Malayziyanın “Sabah” klubundan gəlib. O, müxtəlif illərdə “Neftçi” və “Qəbələ”nin heyətlərində yer alıb.