Polşanın Krakuv şəhəri və Mavopolska bölgəsində keçiriləcək III Avropa Oyunlarında çıxış edəcək karateçilərimiz müəyyənləşib.

Prosport.Az-ın xəbərinə görə, Azərbaycan yalnız kumite yarışında təmsil olunacaq. Kumite üzrə göstəricilərə görə, Azərbaycan hamıdan çox – 8 lisenziya qazanıb (yalnız Polşaya meydan sahibi olduğu üçün 12 idmançı ilə təmsil olunmaq hüququ verilib). Kata və kumite üzrə idmançıların çoxluğuna görə isə, Azərbaycan Polşa (12), İtaliya və Türkiyədən (hər ikisi 9) geri qalır.

Belə ki, 8 idmançımız lisenziya qazanıb. Bunlar kişilərdə Əminağa Quliyev (60 kq), Tural Ağalarzadə (67 kq), Fərid Ağayev (75 kq), Asiman Qurbanlı (+84 kq), qadınlarda Fidan Teymurova (50 kq), Mədinə Sadıqova (55 kq), İrina Zaretskaya (68 kq) və Fəridə Əliyevadır (+68 kq).

Qeyd edək ki, karate yarışları 22-23 iyun tarixlərində Polşanın Byelsko-Byava şəhərindəki "Dembovyets Sports Arena"da keçiriləcək. Hər gün 6 medal oynanılacaq.