"Baş məşqçinin təqdimatının Tofiq Bəhramov adına Respublika stadionunda olmasının 2 səbəbi var". 

Bunu Prosport.Az saytına müsahibəsində I Liqa təmsilçisi olan "İmişli" klubunun icraçı direktoru Aqşin Mürsəlov deyib.

"İmişli" 3 gün əvvəl baş məşqçi postuna gözlənilən təyinatı açıqlayıb. Fərid Namazovla 1 + 1 şərti ilə müqavilə imzalanıb. Sadəcə, Əsgər Abdullayevi əvəzləyən F.Namazovun təqdimatının doğma İmişlidə yox, Bakıda baş tutması qaranlıq qalıb və özü ilə bir neçə sual formalaşdırıb.

"İmişli" rəsmisi bu məsələni şəraitlə əlaqələndirib: "Rayonda Bakıdakı kimi şəraitimiz yoxdur. Amma İmişlidə də təqdimat olacaq. Həm də bununla bir mesaj vermək istədik ki, biz Premyer Liqada çıxış etmək niyyətindəyik. Respublika stadionu həmişə ölkənin 1 nömrəli arenası olub. 

Bu o cür qəbul edilməsin ki, biz ev oyunlarımızı Bakıda keçirmək istəyirik. Çünki hazırda İmişli şəhər stadionunun təbii ot örtüyünü və məşq üçün olan süni qazonu düzəltmək üçün çalışırıq. Bizim komandanın əsas özəlliyi azarkeşinin olmasıdır. Biz də bu azarkeşi dəyişmək niyyətində deyilik. Hədəfimiz yenə Premyer Liqadır".

O, 2 aydır ki, komandanın futbolçularının maaş almaması ilə bağlı yayılanlar barədə isə bunları deyib: "Futbolçular mülki müqavilə əsasında maaş alır. Onlar zamanında vergi ödəməyiblər, hesabatları təqdim etməyib. Çox futbolçu ilə də yollarımızı ayırmışıq. Onlara akt yazdırıb, qol çəkdirmək lazımdır ki, klubun futbolçulara borcu yoxdur. Bu məsələ yaxın zamanda yoluna qoyulacaq".

Qeyd edək ki, yeni baş məşqçi Fərid Namazov ötən ilədək 19 yaşadək millimizdə rəsmi, "İmişli" klubunun Akademiyasında isə koordinator kimi qeyri-rəsmi çalışıb. Ona köməkçi kimi millimizin və "Qarabağ"ın mərkəz müdafiəçisi Bəhlul Mustafazadənin atası Ələmdar Mustafayev təyin olunub. Ə.Mustafayev ötən mövsüm II Liqada İmişlinin digər klubu "Kür-Araz"ı çalışdırıb. "Kür-Araz" yarışı 39 xalla 6-cı sırada bitirib.

Səbuhi Musa