Millimizin və "Qarabağ"ın sabiq futbolçusu, hazırda II Liqada "Şahdağ Qusar"ın kapitanı olan Rahid Əmirquliyev üçün mövsüm uğurlu alındı. Əvvəlcə özü Qusar təmsilçisi ilə II Liqanın ilk bürünc medalını qazandı, daha sonra oğlu Ramil Əmirquliyev "Qarabağ"ın U-13 komandası ilə qızıl medala yiyələndi.

Prosport.Az bu münasibətlə hazırda "Səbail"in U-19 komandasının məşqçisi də işləyən 34 yaşlı futbolçudan müsahibə götürüb.

– Oğlunuzun komandası finalda "Neftçi"yə 1:0 qalib gələrək Azərbaycan çempionu oldu. Ata kimi təəssüratlarını öyrənərdik...
– Çox maraqlı oyun keçdi. AFFA çox gözəl final təşkil etmişdi. “Neftçi” də çempionluğa layiq idi. Onlar da gözəl oyun sərgilədilər. Demək olar ki, eyni səviyyəli oyun getdi. Hər iki tərəf gözəl çıxış etdi. Ancaq “Qarabağ” qol vuraraq qalib gəldi. Çempionluq münasibəti ilə onları təbrik edirəm. Nə qədər belə maraqlı oyunlar olsa, futbolumuz bir o qədər inkişaf edər.

– Ramilin oyunu barədə nə deyə bilərsiniz?
– Hələ uşaqdırlar. İndidən nəsə qəti fikir bildirmək düzgün deyil. Lakin görünür ki, perspektivi var. İnşallah, atasından da güclü futbolçu olacaq.

– Milliyə yeni baş məşqçi təyin olundu. Fernandu Santuşun milliyə nə qədər uğurlu olacağını düşünürsünüz?
– İstərdim ki, milli üçün uğurlu olsun. Ancaq inanmağım gəlmir ki, bizə köməyi dəysin. Həm də onun yaşı da cavan deyil. Mən düşünürəm ki, onun əvəzinə yerli məşqçi təyin edilib, vaxt verilsəydi, pis olmazdı. Təki, mən yanılım. Amma inanmıram ki, hansısa yaxşı nəticə olsun.

– "Şahdağ Qusar" komandası ilə II Liqada bürünc medalları qazandınız. Orada çıxışınızı davam etdirəcəksiniz?
– Çox güman ki, komanda yenə II Liqada mübarizə aparacaq. Belə olsa, o zaman çıxışımı davam etdirəcəyəm. I Liqada oynamaq bir az mənə çətin olar. Onun üçün gərək daim məşq edim ki, formada qalım.