AFFA U-13 Liqasının finalında “Qarabağ”ın “Neftçi”ni 1:0 hesabı ilə məğlub etdiyi görüşün iştirakçıları arasında bu günlərdə karyerasını başa vuran Ağdam təmsilçisinin əsas komandasının kapitanı Maksim Medvedevin oğlu Miroslav da olub.

Prosport.Az xəbər verir ki, Miroslav Medvedev oyundan sonra jurnalistlərə açıqlamasında komandasının çempionluğunu belə şərh edib: “Mən özümə və komandama inanırdım. Bilirdim ki, finalda qalib gələcəyik. Ola bilər ki, topa nəzarətdə rəqibə uduzurduq. Lakin “Neftçi”dən fərqli olaraq, biz komanda şəklində qalib gəlmək istəyirdik. Daha yaxşı, daha güclü komanda olduğumuz üçün çempionluğu qazandıq”.

13 yaşlı futbolçu özünü çox yaxşı hiss etdiyini söyləyib: “Təsəvvür belə edə bilməzdim ki, bu cür gözəl stadionda, bu cür yaxşı komanda ilə birgə kuboku başımın üzərinə qaldıracağam”.

Miroslav Medvedev daim atasının dəstəyini hiss etdiyini vurğulayıb: “İstərdim ki, o mənim əlavə məşqlərimə daha çox vaxt ayırsın. Düzdür, bu gün atam stadionda yoxdur. Lakin qalib gəldiyimizi bilir. Daim atamın dəstəyini hiss etmişəm”.

Onu da qeyd edək ki, "Qarabağ"ın "Neftçi" ilə müntəzəm çempionatdakı 2 oyunu da bu hesabla başa çatmışdı. Noyabrın 4-də Hövsan qəsəbəsindəki Fövqəla Hallar Nazirliyinin stadionunda "Qarabağ", martın 30-da Cüdo Federasiyasının təlim-məşq bazasının stadionunda "Neftçi" 1:0 qalib gəlmişdi.