Futbol millimizə baş məşqçi təyin olunan Fernandu Santuşun bir köməkçisinin adı bilinib.

Prosport.Az-ın xəbərinə görə, bu, məşqçilik karyerası Fernandu Santuşla bağlı olan Rikardu Miqel Kandidu de Souza Santuşdur.

Qısaca Rikardu Santuş kimi tanınan məşqçinin 42 yaşı var. R.Santuş AEK (Yunanıstan), "Benfika" (Portuqaliya), PAOK (Yunanıstan), "Beşiktaş" (Türkiyə) klublarında, Yunanıstan, Portuqaliya və Polşa millilərində F.Santuşun köməkçisi olub. 20 ilə yaxındır ki, Santuşlar bir-birinə sadiqdir.

Soyadı Koşta olan digər portuqaliyalı isə Fernandu Santuşun marketinq işləri ilə məşğuldur. Baş məşqçini "Beşiktaş"a və AFFA-ya təklif edən şəxs isə türkiyəli tanınmış menecer Ahmet Bulutdur. Məhz bu qonaqlar bu gün həm Fernandu Santuşun mətbuat konfransında, həm də AFFA prezidenti Rövşən Nəcəfin qəbulunda olub.

Qeyd edək ki, mətbuatda onun köməkçiləri kimi Arif Əsədov və Kamran Ağayevin də qalacağı iddia olunur. Lakin AFFA-nın icraçı vitse-prezidenti Sərxan Hacıyev bu məsələ barədə daha sonra qərar veriləcəyini bildirib.

Səbuhi Musa