Millimizin kapitanı Emin Mahmudov Macarıstanda Qazaxıstan yığmasına 3:2 hesabı ilə qalib gəldikləri  yoldaşlıq görüşündən sonra brifinq keçirib.

Prosport.Az xəbər verir ki. 32 yaşlı yarımmüdafiəçi həm matç, həm də tarixi rekorda şərik olması barədə danışıb.

- Oyunumuz hücumda çox yaxşı alındı. Xeyli qol fürsəti yaratdıq. Təəssüf ki, birinci hissədə bunlardan yararlana bilmədik. Müdafiədə səhvlərimiz çox idi. Rəqibin də bir neçə qol şansı oldu. Yaxşı mübarizə apardıq və qələbəyə layiq idik.

- Millidə qol sayında Qurban Qurbanova çatdınız. Təəssüratlarınız necədir?

- Çox sevindim. Bütün komanda yoldaşlarıma təşəkkür edirəm ki, mənə qol vurmağa kömək edirlər. 27 yaşım olanda heç gözləmirdim ki, nə vaxtsa Qurban Qurbanova çata bilərəm. Çünki az oynayırdım. Sonradan qollar gəldi. Gələcəkdə daha çox qol vurub milliyə kömək etməyə çalışacağam.

- Qurban Qurbanov sizi təbrik etdi?

- Hələ ki, yox. Qurban müəllimlə münasibətim yaxşıdı. Bilmirəm, təbrik edəcək, ya yox. Hələ onu keçməmişəm. Amma sevinərəm.

- Bu rekord "Neftçi"dəki performansınıza təsir edə bilər?

- "Neftçi"də yaxşı komanda qurulsa, tək mən yox, hamı yaxşı oynayar. Ümid edirəm ki, gələn mövsüm daha yaxşı olarıq. Bu il klub olaraq hamımız çox bərbad idik. Daha yaxşı olmalıyıq.

- Hücumda oyununuz daha yaxşı alınırdı. Sizcə, bu, nə ilə bağlıdır?

- Albaniya ilə oyunda da şanslarımız çox idi. Sadəcə, qol vura bilmirdik. Onların səviyyəsi bizdən, Qazaxıstandan üstündür. Avropa çempionatına gedirlər. Qollar vurmaq lazımdı.